भोस्ते घाटात रासायनिक गाळ वाहून नेणाऱ्या ट्रकचा भीषण अपघात, चालक जागीच ठार

0

खेड : मुंबई-गोवा महामार्गावरील भोस्ते घाटातील अवघड वळणावर रासायनिक गाळ वाहून नेणाऱ्या ट्रकला झालेल्या भीषण अपघातात केबिनमध्ये अडकून चालकाचा मृत्यू झाला.

ही घटना सोमवारी दुपारी तीन वाजण्याच्या सुमारास घडली असून या अपघातात ट्रकचा चक्काचूर झाला आहे. नबी सरवर असे या अपघातात मृत पावलेल्या चालकाचे नाव असल्याचे पोलिसांकडून सांगण्यात आले.

घटनास्थळावरून मिळालेल्या माहितीनुसार लोटे औद्योगिक वसाहतीतून रासायनिक गाळ घेऊन मुंबईकडे जाणारा हा ट्रक भोस्ते घाट उतरत असताना अवघड वळणावर चालक नबी सरवर याचा ट्रकवरील ताबा सुटला आणि ट्रक रस्त्यात उलटला. या अपघातात केबिनमध्ये अडकून पडलेला चालक मदतीसाठी टाहो फोडत होता. मात्र घटनास्थळी मदतपथक पोहचण्यास उशीर झाल्याने त्यांचा मृत्यू ओढवला.

अपघाताची खबर मिळताच कशेडी येथील महामार्ग पोलीस टॅपचे पोलीस उपनिरीक्षक अनिल चांदणे आपल्या सहकाऱ्यांसह घटनास्थळी दाखल झाले. त्याच दरम्यान खेड येथील मदत ग्रुपचे प्रसाद गांधी, तसेच रेस्क्यू टीमचे बुऱ्हाण टांकेदेखील आपल्या सहकार्यांसह घटनास्थळी पोहचले. केबिनमध्ये अडकून पडलेल्या चालकाचा मृतदेह बाहेर काढणे शक्य नसल्याने क्रेन मागविण्यात आली. क्रेन आल्यावर क्रेनच्या सहाय्याने केबिनमध्ये अडकून पडलेला चालकाचा मृतदेह बाहेर काढण्यात आला. या अपघातामुळे महामार्गावरील एका बाजूची वाहतूक थांबवण्यात आली होती.

भोस्ते घाटातील या अवघड वळणावर आतपर्यंत अनेक अपघात झाले आहेत. चौपदरीकरणादरम्यान वळणाचे काम योग्य प्रकारे न झाल्याने या ठिकाणी वारंवार जीवघेणे आपघात होत आहेत. या वळणावर अपघात होऊ नये यासाठी आवश्यक त्या उपायोजना करण्यात याव्यात अशी मागणी होत आहे.

रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
www.ratnagirikhabardar.com
https://bit.ly/2NQVeEc
10:18 AM 28-Dec-21

LEAVE A REPLY

Please enter your comment!
Please enter your name here