अजितदादा तुम्ही जिथे आहात, तिथे मी यायची गरज नाही, आपण एकत्रच : मुख्यमंत्री उद्धव ठाकरे

0

मुंबई : महाविकास आघाडीत सगळं काही आलबेल नसल्याच्या बातम्या समोर येत आहेत. मात्र असं असताना आजच्या जीएसटी भवनाच्या भूमीपूजन कार्यक्रमामध्ये मुख्यमंत्री आणि उपमुख्यमंत्र्यांमध्ये खास जुगलबंदी रंगली. दादा तुम्ही जिथे आहात, तिथे मी यायची गरज नाही, आपण एकत्रच आहोत, असं म्हणत मुख्यमंत्री उद्धव ठाकरे यांनी अजित पवारांच्या कामाचं कौतुक केलं तसंच जीएसटी भवनाच्या कामाचं श्रेय दिलं.

मुंबईत आज नवीन जीएसटी भवनाच्या इमारतीचा भूमीपूजन कार्यक्रम मुख्यमंत्री उद्धव ठाकरे यांच्या हस्ते संपन्न झाला. या कार्यक्रमाला उपमुख्यमंत्री अजित पवार, नगरविकास मंत्री एकनाथ शिंदे देखील उपस्थित होते. यावेळी मुख्यमंत्री उद्धव ठाकरे आणि उपमुख्यमंत्री अजित पवार यांच्यात शाब्दिक जुगलबंदी पाहायला मिळाली.

मुख्यमंत्र्यांनी भूमीपूजन कार्यक्रमाला व्हिडीओ कॉन्फरन्सिंगच्या माध्यमातून उपस्थिती लावली होती. याचाच धागा पकडून अजित पवारांनी कोटी केली. “सीएमसाहेब तुम्ही आमच्या खात्याच्या कार्यक्रमांना येत नाहीत म्हणून नाराजी आणि मतभेदाच्या बातम्या येतात”, असं म्हणत अजितदादांनी उद्धव ठाकरेंनी चिमटा काढला. त्यावर मुख्यमंत्र्यांनीही अजित पवार यांना खास उत्तर दिलं. दादा तुम्ही जिथे आहात, तिथे मी यायची गरज नाही, आपण एकत्रच आहोत, असं ते म्हणाले.

महाविकास आघाडीत मतभेद आहेत, आमदार नाराज आहे, वरिष्ठांमध्ये आलबेल नसल्याच्या बातम्या मुद्दाहून पेरल्या जात आहेत. तसं वातावरण तयार करण्याचा प्रयत्न होतोय. पण आजच्या कार्यक्रमाच्या निमित्ताने मी सांगू इच्छितो, की महाविकास आघाडीत कोणतेही मतभेद नाहीत. सगळं काही आलबेल आहे. सरकार व्यवस्थित काम करत आहे, असं मुख्यमंत्र्यांनी स्पष्ट केलं.

आजच्या जीएसटी भवनाच्या भूमीपूजनाचं सारं श्रेय मी अजितदादांना देतो. त्यांनी जे काय संकल्पचित्र दाखवलं ते अप्रतिम आहे. आजचा भूमीपूजन सोहळा फक्त नारळ फोडायचा नाही तर प्रत्यक्ष कामाला सुरुवात झाली आहे, असंही मुख्यमंत्री म्हणाले.

रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
www.ratnagirikhabardar.com
https://bit.ly/2NQVeEc
5:12 PM 02-Apr-22

LEAVE A REPLY

Please enter your comment!
Please enter your name here