चिपळूण : चिपळूण येथील हेल्प फौंडेशनतर्फे येत्या शनिवारी, १३ मे रोजी सकाळी १० वाजता डीबीजे कॉलेजच्या कॉन्फरन्स हॉलमध्ये जल परिषदेचे आयोजन करण्यात आले आहे.या जल परिषदेला सिंचन विभागाचे माजी सचिव आणि आंतरराष्ट्रीय पातळीवरचे संशोधक पत्रिकेचे लेखक सिंचनतज्ज्ञ दि.
म. मोरे, प्रसिद्ध पर्यावरणवादी वकील असीम सरोदे, प्रसिद्ध आर्किटेक्ट सारंग यादवाडकर उपस्थित राहणार आहेत. जल परिषदेत लाल, निळ्या रेषा आणि पूरनियोजनावर चर्चा होणार आहे.
या परिषदेला आमदार शेखर निकम, माजी आमदार सदानंद चव्हाण, प्रांताधिकारी प्रवीण पवार, जलसंपदा विभागाचे कार्यकारी अभियंता जगदीश पाटील, चिपळूणचे मुख्याधिकारी प्रसाद शिंगटे उपस्थित राहणार आहेत. या कार्यक्रमाचे प्रमुख मार्गदर्शक दि. म. मोरे यांनी १९७२ मध्ये सिव्हिल इंजिनिअरिंगमध्ये पुणे विद्यापीठात सुवर्ण ‘पदक पटकावले आहे. पारंपरिक जल नियोजन या विषयात डॉक्टरेट मिळवली आहे. सैन्याच्या अभियंता विभागात काम केल्यावर महाराष्ट्र शासनाच्या सिंचन विभागात काम केले. तसेच महाराष्ट्र सिंचन सहयोगचे अध्यक्ष म्हणून काम पाहिलेले आहे. असीम सरोदे हे संविधानतज्ज्ञ, मानवी हक्क विश्लेषक वकील, उच्च न्यायालय प्रथितयश वकील आहेत. पर्यावरण व मानवी हक्क संरक्षण क्षेत्रात विशेष काम करतात. मेलिंडा आणि बिल गेट्स फौंडेशनतर्फे आणि डॉक्टर समाजसेवकांना कायदेशीर आणि सामाजिक अडचणी याविषयीचे ते प्रशिक्षक आहेत.
लाल व निळ्या रेषांबाबत यादवाडकर यांनीच जनहित दाखल केली होती. ते पुणे शहरविकास आराखडा नियोजन समितीचे सदस्य आहेत. गेली वीस नद्यांमधील प्रदूषण, अतिक्रमणे आणि शहरी पूर यावर काम करत आहेत. नद्यांच्या संरक्षणासाठी त्यांनी वेगवेगळ्या ठिकाणी अनेक दावे दाखल केले आहेत.चिपळूण शहराच्या नियोजनबाबत महत्त्वाच्या ठरणार्या या जलपरिषदेला नागरिकांनी आणि अभ्यासकांनी उपस्थित राहावे, असे आवाहन हेल्प फौंडेशनचे अध्यक्ष सतीश कदम आणि सहयोगी आशीष जोगळेकर यांनी केले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
16:43 10-05-2023
