रत्नागिरी : चिपळूण शहरातील शंकरवाडीतील रहिवासी व प्रसिद्ध ठेकेदार सूरज रत्नाकर डांगे उर्फ नाना (43, शंकरवाडी, चिपळूण) याचा मृतदेह दिवा-सावंतवाडी पॅसेंजरखाली आढळून आला.
ही घटना काल गुरुवार दि. २४ ऑगस्ट रोजी घडली. नानाने आत्महत्या केली असावी अशी चर्चा सुरु आहे कारण यापूर्वी एकदा त्याने सावकारीला कंटाळून तसा प्रयत्न केला होता असे समजते.
चिपळूण रेल्वे सुरक्षा बलाचे जवान जगदीश अर्जुन डांगे (38, चिपळूण) यांनी पोलीस ठाण्यात फिर्याद दिल्यानुसार काल दुपारी 12.30 वाजता चिपळूणचे स्टेशन मास्तर नवनीत गमरे यांनी भ्रमणध्वनीद्वारे कि.मी.नं. 127/0 येथे रेल्वे नं. 10105 डाऊन दिवा-सावंतवाडी रेल्वे ट्रकवर अपघात झाला आहे, अशी माहिती दिली. त्यांनी वरिष्ठाना सांगून घटनास्थळी जाऊन पाहिले असता नाना डांगे यांच्या अंगावरून रेल्वे गाडी गेली होती. त्यात त्यांचे निधन झाले. पोलिसांनी या प्रकरणी आकस्मिक मृत्यू म्हणून नोंद केली आहे. नाना हा सुस्वभावी तरुण होता. तो ठेकेदार म्हणून काम करीत असल्याने आर्थिक अडचणीतून त्याने आत्महत्या केली असल्याची चर्चा शहरात सुरु होती. कारण या पूर्वी त्याने तसा प्रयत्न केला असल्याचेही बोलले जात आहे. ठेकेदार संघटनेचे अध्यक्ष्ा रणजित डांगे यांचा तो लहान भाऊ होता. त्याच्या पश्चात पत्नी, दोन मुले, वडिल, भाऊ, भावजय असा परिवार आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:29 25-08-2023
