रत्नागिरी : तालुक्यातील गावडेआंबेरे येथील विहिरीत दोन प्रौढांचे मृतदेह सापडल्याने एकच खळबळ उडाली.
ही धक्कादायक घटना रविवार 17 सप्टेंबर रोजी सकाळी उघडकीला आली. यात घातपात असल्याचा संशय निर्माण होत असून सायंकाळी उशिरापर्यंत मृतदेहांचा ओळख पटलेली नाही.
याबाबत गावडे आंबेरे येथील पोलिस पाटील अदिती लाड यांनी पूर्णगड पोलिस ठाण्यात खबर दिली. त्यानुसार,रविवारी सकाळी गावडेआंबेरे येथील स्मशानभूमीकडे जाणार्‍या रस्त्याच्या बाजुला असलेल्या विहिरीत दोन मृतदेह तेथील ग्रामस्थांना दिसून आले. यातील एक मृतदेह अंदाजे 45 तर दुसरा अंदाजे 50 वर्ष वयाच्या प्रौढाचा आहे. याबाबत ग्रामस्थांनी पोलिस पाटील लाड यांना माहिती देताच त्यांनी पूर्णगड पोलिसांना याची खबर दिली.
पूर्णगड पोलिसांनी तातडीने घटनास्थळी धाव धेत मृतदेहांचा पंचनामा करुन उत्तरीय तपासणीसाठी जिल्हा शासकिय रुग्णालयात पाठवला. यातील अंदाजे 45 वर्षे वय असलेल्या प्रौढाच्या अंगात काळा टिशर्ट, चॉकलेटी ट्रॅक पॅन्ट, गळ्यात जानवे हातात लाल दोरा आहे. तर 50 वर्षे वय असलेल्या प्रौढाच्या अंगात पांढरा टिशर्ट आणि राखाडी ट्रॅक पॅन्ट, गळ्यात लाल दोरा आहे. विहिरीमध्ये दोन मृतदेह सापडून आल्याने यात घातपाताचा हात असल्याचा संशय येत असल्याने अधिक तपास पूर्णगड पोलिस करत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:17 18-09-2023
