पावस : गाडीचा पाठलाग करून गाडीवरील दहा वर्षांच्या शाळकरी मुलीच्या मांडीला कुत्र्याने चावा घेतल्याची घटना पावस (ता. रत्नागिरी) परिसरात दोन दिवसांपूर्वी घडली. स्वरा पाटील असे तिचे नाव असून, गेल्या आठ दिवसांत भटक्या श्वानांनी तिघांवर हल्ला करून जखमी केले आहे.
चौथीमध्ये शिकणारी स्वरा पाटील आपल्या वडिलांबरोबर गाडीवरून जात होती. ते पावस येथील गाडी अड्डयातील चौकामध्ये आले असता श्वानांनी पाठलाग केला. त्यावेळी पाठीमागे बसलेल्या स्वराच्या मांडीला एका कुत्र्याने चावा घेतला. त्यामध्ये ती जखमी झाली. तिच्यावर तत्काळ वैद्यकीय उपचार करण्यात आले. चार-पाच दिवसांपूर्वी एका व्यक्तीचा भटक्या कुत्र्याने असाच लचका तोडला होता. गाडी अड्डयातील चौकामध्ये शाळेत जाणाऱ्या मुलांची व स्वामी मंदिराकडे जाणाऱ्या लोकांची नेहमीच गर्दी असते. या भागात भटक्या श्वानांना रस्त्यावरच खाद्यपदार्थ घातले जात असल्याने या श्वानांचा कायम येथे घोळका असतो. हे श्वान ग्रामस्थांचा पाठलाग करत असतात. या कुत्र्यांचा बंदोबस्त करण्याची मागणी होत आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
04:46 PM 03/Nov/2023