चिपळूण : चिपळूण शहर परिसरात रुग्णांच्या संख्येत दिवसेंदिवस वाढ होत आहे. प्रामुख्याने दाट लोकवस्तीच्या भागात या आजाराच्या रुग्णांची संख्या वाढू लागली आहे. आजारावर नियंत्रण मिळविण्यासाठी व साथ पसरू नये याकरिता आरोग्य विभागाने तातडीने उपाययोजना करावी, अशी मागणी नागरिकांकडून सुरू झाली आहे.
चिपळूण शहर परिसरात सध्या विविध साथीच्या आजाराचे रुग्ण वाढू लागले आहेत. प्रामुख्याने शहर परिसरातील दाट लोकवस्ती असलेल्या भागात डेंग्यूसदृश आजाराच्या रुग्णांची संख्या वेगाने वाढत आहे. काही रुग्ण शासकीय रुग्णालयात उपचारासाठी दाखल झाल्याचे सांगण्यात येते. तर अनेक रुग्ण खासगी दवाखान्यात उपचार घेत असल्याचे दिसून येत आहे.
पंधरा दिवसांपूर्वी शहरातील साथीचे आजार व डेंग्यूसदृश आजाराच्या रुग्णांची पाहणी व तपासणी करण्यासाठी चिपळूण न. प. आरोग्य विभाग व तालुका वैद्यकीय अधिकारी यांच्या मार्गदर्शनाखाली विशेष पथक नेमण्याचा निर्णय झाला. या साथीच्या आजारांवर नियंत्रण मिळविण्यास यश मिळालेले नाही.
अद्यापही शहरात डेंग्यूसदृश रुग्णांची दिवसेंदिवस वाढ होत आहे, तर नगरपालिका व आरोग्य यंत्रणेकडून साथीवर नियंत्रण करण्याकरिता आवश्यक त्या उपाययोजनांचे पाहिजे त्या प्रमाणात नियोजन होत नसल्याचे दिसून येत आहे.
स्वच्छता, धूर फवारणी आदी गोष्टी तातडीने होणे आवश्यक आहे. अनेक भागात प्रामुख्याने दाट लोकवस्तीच्या भागात आवश्यक असणारी फवारणी होत नसल्याची नाराजी नागरिकांकडून व्यक्त होत आहे. एकूणच गेल्या दीड महिन्यात शहरात डेंग्यू आजाराने जम बसविला आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
02:41 PM 20/Nov/2023
