भाजपने 125 तर शिवसेनेने 70 जणांना उमेदवारी केली जाहीर

0

मुंबई : भारतीय जनता पक्ष आणि शिवसेना या दोन्ही सत्तारूढ पक्षांनी विधानसभा निवडणुकीसाठी मंगळवारी आपापल्या उमेदवारांच्या पहिल्या याद्या जाहीर केल्या. भाजपने 125 तर शिवसेनेने 70 जणांना उमेदवारी जाहीर केली आहे. भाजपने मुख्यमंत्री देवेंद्र फडणवीस, पंकजा मुंडे, गिरीश महाजन, सुभाष देशमुख आदी मंत्र्यांसह 85 विद्यमानांना उमेदवारी दिली आहे. त्याशिवाय प्रदेशाध्यक्ष चंद्रकांत पाटील यांचा यादीत समावेश आहे. त्याचप्रमाणे काँग्रेस-राष्ट्रवादीतून आलेल्यांनाही उमेदवारी देण्यात आली आहे. या पहिल्या यादीत ज्येष्ठ नेते एकनाथ खडसे, विनोद तावडे, प्रकाश मेहता, चंद्रशेखर बावनकुळे यांचा समावेश नाही. पहिल्या यादीत नाव नसल्याने खडसे यांनी बंडाचा पवित्रा घेतला आहे. शिवसेनेच्या यादीत आदित्य ठाकरे, एन्काउन्टर स्पेशालिस्ट प्रदीप शर्मा, एकनाथ शिंदे आदींचा समावेश असून शिवसेनेत आलेले जयदत्त क्षीरसागर यांच्यासह नवागतांना संधी देण्यात आली आहे. युतीचा फॉर्म्युला निश्चित झाल्यानंतर भाजपने आपली 125 उमेदवारांची पहिली यादी जाहीर केली. या यादीमधून भाजपचे दिग्गज नेते एकनाथ खडसे, शिक्षणमंत्री विनोद तावडे, ऊर्जामंत्री चंद्रशेखर बावनकुळे, माजी मंत्री प्रकाश मेहता यांना वगळण्यात आल्याने त्यांच्या उमेदवारीवर प्रश्नचिन्ह निर्माण झाले आहे. पहिल्या यादीत पक्षाने डावलल्याने खडसे यांनी मुक्ताईनगर मतदारसंघातून आपला उमेदवारी अर्ज दाखल करीत बंडखोरीचा इशारा दिला. या यादीत 85 विद्यमान आमदारांना तिकिटे देण्यात आली असून 8 आमदारांना डच्चू देण्यात आला आहे. भाजप-शिवसेना युतीचे जागावाटप निश्चित झाले असून भाजपला 164 तर शिवसेनेला 124 जागा मिळाल्या आहेत. भाजप आपल्या कोट्यातून घटक पक्षांसाठी जागा सोडणार आहे. घटक पक्षांच्या जागांचा तिढा कायम असला तरी भाजपने दिल्लीतून आपली पहिली यादी जाहीर केली. या यादीत मुख्यमंत्री देवेंद्र फडणवीस, प्रदेशाध्यक्ष चंद्रकांत पाटील, ग्रामविकासमंत्री पंकजा मुंडे, जलसंपदामंत्री गिरीश महाजन, सहकारमंत्री सुभाष देशमुख यांच्यासह अनेक विद्यमान मंत्र्यांची उमेदवारी जाहीर करण्यात आली आहे. मात्र, काही बड्या नेत्यांना धक्का बसला आहे. पुण्यातील जमीन खरेदीप्रकरणी मंत्रिपद गमवावे लागलेले एकनाथ खडसे त्यानंतर पक्षाच्या निर्णय प्रक्रियेतून बाहेर फेकले गेले होते.

HTML tutorial

LEAVE A REPLY

Please enter your comment!
Please enter your name here