अहमदाबाद : यंदाच्या वर्षी ऋषभ पंत हा जबरदस्त फॉर्ममध्ये आहे. ऑस्ट्रेलिया दौरा गाजवल्यानंतर पंतने इंग्लंडविरुद्धच्या चौथ्या टेस्टमध्येही धमाकेदार शतक करत भारताला मजबूत स्थितीमध्ये पोहोचवलं. याआधी ऋषभ पंतच्या विकेट कीपिंगवर टीका व्हायची, पण या सीरिजमध्ये त्याने उत्कृष्ट कीपिंग करत टीकाकारांची बोलती बंद केली. विकेटच्या मागे ऋषभ पंतचं बोलणंही सोशल मीडियावर चांगलंच व्हायरल होतं. टीम इंडियाचा ओपनर रोहित शर्माने ऋषभ पंतला खेळपट्टीमागे एवढा का बोलतोस? असा प्रश्न विचारला. ऋषभ पंतनेही रोहितच्या या प्रश्नाचं मजेशीर उत्तर दिलं. खेळाचा आनंद घेण्यासाठी मी खेळपट्टी मागून एवढा बोलतो. यामुळे टीमचा आत्मविश्वासही वाढलेला राहतो. टीमला काहीही करून मदत व्हावी, असा माझा प्रयत्न असतो, असं पंत म्हणाला. बीसीसीआयने रोहित आणि पंत यांच्यातल्या चर्चेचा व्हिडिओ सोशल मीडियावर शेयर केला आहे. या व्हिडिओमध्ये रोहितने पंत आणि वॉशिंग्टन सुंदरसोबतही बातचित केली. रोहित शर्माने या मुलाखतीमध्ये पंतला त्याच्या शतकी खेळीबद्दलही विचारलं. ‘बॅटिंगसाठी मैदानात उतरलास तेव्हा टीमची अवस्था बिकट होती. त्यावेळी तुझ्या डोक्यात काय होतं?’ असं रोहितने विचारलं. याला उत्तर देताना पंत म्हणाला, ‘मी थोडा वेळ घेतला. खेळपट्टी जाणून घ्यायचा प्रयत्न केला.’ पंतच्या या उत्तरावर रोहितने टोमणा मारला. तू खरंच एवढा विचार करतोस का? असं रोहितने विचारलं. पहिले खेळपट्टी बघ आणि मगच शॉट खेळ, असं तूच मला सांगितलंस, तुझंच ऐकून मी बॅटिंग केली, असं उत्तर पंतने रोहितला दिलं.
रत्नागिरी खबरदार
(RNI NO. MAHMAR/2013/57411)
शासनमान्य रजिस्टर न्यूजपेपर
www.ratnagirikhabardar.com
https://bit.ly/2NQVeEc
3:39 PM 06-Mar-21