राजापूर: रत्नागिरी जिल्ह्यातील राजापूर तालुक्यात चोरीच्या घटनांनी पुन्हा एकदा डोके वर काढले आहे. ओशिवळे, गुरववाडी येथील एका बंद घराचे कुलूप तोडून अज्ञात चोरट्यांनी धाडसी घरफोडी केली. या घटनेत चोरट्यांनी कपाटातील रोख रक्कम आणि महत्त्वाचे इलेक्ट्रिक साहित्य लंपास केले असून, याप्रकरणी राजापूर पोलीस ठाण्यात गुन्हा दाखल करण्यात आला आहे.
नेमकी घटना काय?
मिळालेल्या माहितीनुसार, ओशिवळे (गुरववाडी) येथील रहिवासी अनिल दत्ताराम गुरव (५१) हे व्यवसायानिमित्त चालक म्हणून बाहेर असतात. त्यांचे चुलते झिमाजी रामचंद्र गुरव यांचे घर सध्या बंद होते. दि. २० फेब्रुवारी रोजी सायंकाळी ७ ते २१ फेब्रुवारी रोजी सकाळी या दरम्यान अज्ञात चोरट्यांनी या संधीचा फायदा घेतला.
चोरट्यांनी घराच्या मुख्य दरवाजाचा कडी-कोयंडा कोणत्यातरी तीक्ष्ण हत्याराने उचकटून घरात प्रवेश केला. घरातील बेडरूममध्ये असलेल्या लोखंडी कपाटाचे दरवाजे आणि तिजोरी जबरदस्तीने उचकटून त्यातील रोख रक्कम आणि घरगुती वापराचे इलेक्ट्रिक साहित्य चोरून नेले.
पोलीस ठाण्यात गुन्हा दाखल
या चोरीबाबत अनिल गुरव यांनी राजापूर पोलीस ठाण्यात रीतसर तक्रार दिली आहे. त्यांच्या तक्रारीवरून पोलिसांनी अज्ञात चोरट्यांविरुद्ध भारतीय न्याय संहिता (BNS) २०२३ चे कलम ३०५ (क), ३३१(३) आणि ३३१(४) अन्वये गुन्हा दाखल केला आहे. घटनेचा अधिक तपास राजापूर पोलीस करत आहेत.
ग्रामीण भागात भीतीचे वातावरण
राजापूरच्या ग्रामीण भागात मागील काही दिवसांपासून चोरीच्या घटनांमध्ये वाढ झाली आहे. बंद घरे लक्ष्य केली जात असल्याने नागरिकांमध्ये भीतीचे आणि चिंतेचे वातावरण आहे. रात्रीची गस्त वाढवावी अशी मागणी आता स्थानिक ग्रामस्थांकडून केली जात आहे.
महत्त्वाची सूचना: आपले घर बंद करून बाहेर जाताना शेजाऱ्यांना कल्पना द्यावी आणि शक्य असल्यास मौल्यवान वस्तू सुरक्षित ठिकाणी ठेवाव्यात, असे आवाहन प्रशासनाकडून करण्यात येत आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:46 23-02-2026
