राजापूर: “राजापूर शहराच्या सर्वांगीण विकासासाठी आवश्यक असणारा निधी उपलब्ध करून दिला जाईल आणि विकासकामांत कोणतीही कसर सोडली जाणार नाही,” अशी ग्वाही राजापूर-लांजा-साखरपा मतदारसंघाचे आमदार किरण (भैय्या) सामंत यांनी दिली. राजापूर नगर परिषदेला दिलेल्या सदिच्छा भेटीदरम्यान ते बोलत होते.
राजापूर नगर परिषदेचे १५० व्या वर्षात पदार्पण
राजापूर नगर परिषद १ एप्रिल २०२६ रोजी आपल्या स्थापनेच्या १५० व्या वर्षात पदार्पण करत आहे. या ऐतिहासिक वर्षानिमित्त शहरात वर्षभर विविध उपक्रम राबवले जाणार असून, या सर्व कामांना पूर्ण सहकार्य करण्याचे आश्वासन आमदार सामंत यांनी दिले.
महत्त्वाचे निर्णय आणि चर्चा:
- पाणीपुरवठा योजना: कोदवली येथील धरणाचे काम आणि नवीन पाणीपुरवठा योजनेचा आढावा घेण्यात आला. योजनेच्या डीपीआरमधील त्रुटी दूर करण्यासाठी संबंधित अधिकारी आणि कंत्राटदारांसोबत स्वतंत्र बैठक घेण्याचे आदेश त्यांनी दिले.
- देवस्थान इनाम जमिनीचा प्रश्न: देवस्थान इनाम जमिनीवरील घरदुरुस्ती आणि बांधकामात येणाऱ्या अडचणी लवकरच सोडवल्या जातील. प्रशासनाशी चर्चा करून नागरिकांना दिलासा देण्याचे आश्वासन यावेळी देण्यात आले.
- प्रशासकीय इमारती: नगर परिषदेची नवीन प्रशासकीय इमारत, कर्मचारी निवासस्थान आणि रेस्ट हाऊसच्या प्रस्तावासाठी पाठपुरावा केला जाईल.
- नगर परिषदेला सूचना: नगर परिषदेने उत्पन्न वाढीच्या दृष्टीने आवश्यक आणि ठोस निर्णय घ्यावेत, अशी सूचनाही त्यांनी यावेळी केली.
यावेळी नगराध्यक्षा ॲड. हुस्नबानू खलिफे, नगरसेवक आणि पालिका अधिकारी मोठ्या संख्येने उपस्थित होते.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
16:24 23-02-2026
