रत्नागिरी: रत्नागिरी जिल्ह्यातील भूमी अभिलेख विभागाच्या कर्मचाऱ्यांनी आपल्या प्रलंबित मागण्यांसाठी आक्रमक पवित्रा घेतला आहे. भूमी अभिलेख कर्मचारी कृती समितीच्या वतीने सोमवारपासून पाच दिवसांचे सामूहिक रजेवर जाऊन ‘असहकार आंदोलन’ पुकारण्यात आले आहे. या आंदोलनामुळे जिल्ह्यातील जमिनींच्या मोजणीची कामे रखडण्याची शक्यता निर्माण झाली असून सामान्य जनतेला याचा फटका बसणार आहे.
९६ टक्के कर्मचाऱ्यांचा सहभाग
संघटनेने दिलेल्या माहितीनुसार, या आंदोलनात जिल्ह्यातील तब्बल ९६ टक्के कर्मचारी सहभागी झाले आहेत. २३ फेब्रुवारी ते २७ फेब्रुवारी या कालावधीत सर्व कर्मचारी सामूहिक रजेवर असणार आहेत. यापूर्वी १८ आणि २० फेब्रुवारी रोजी कर्मचाऱ्यांनी आपले मोजणी साहित्य कार्यालयात जमा करून मोजणी काम पूर्णपणे बंद केले होते. तसेच काळ्या फिती लावून प्रशासनाचा निषेधही नोंदवला होता.
कर्मचाऱ्यांच्या प्रमुख मागण्या काय आहेत?
भूमी अभिलेख कर्मचाऱ्यांनी प्रशासनासमोर अनेक तांत्रिक आणि प्रशासकीय मागण्या ठेवल्या आहेत:
- ई-मोजणी व्हर्जन २ सॉफ्टवेअर: हे सॉफ्टवेअर व्हर्जन १ प्रमाणे सुटसुटीत आणि वापरण्यास सोपे करावे.
- दंडात्मक कारवाईला विरोध: चौकशीशिवाय कर्मचाऱ्यांवर थेट फौजदारी गुन्हे दाखल करण्याची ‘अमानवी’ पद्धत बंद करावी.
- साधनसामग्रीचा पुरवठा: प्रत्येक कर्मचाऱ्याला पुरेसे आणि स्वतंत्र मोजणी साहित्य (रोव्हर), लॅपटॉप आणि डेटा कार्ड पुरवण्यात यावे.
- सुट्टीच्या दिवशी काम नको: शासकीय सुट्टीच्या दिवशी अपवाद वगळता कोणतेही कामकाज लादले जाऊ नये.
- वेतन वसुली आदेश: जिल्हा अधीक्षक भूमी अभिलेख स्तरावरून सुरू असलेले नियमबाह्य वेतन वसुली आदेश तातडीने थांबवावेत.
- अतिरिक्त कामाचा मोबदला: अतिरिक्त कामकाज केल्यास त्याचा नियमानुसार मोबदला मिळावा.
पुण्यात धरणे आंदोलन आणि ‘बेमुदत’ संपाचा इशारा
आंदोलनाचा पुढचा टप्पा म्हणून २७ फेब्रुवारी रोजी जमाबंदी आयुक्त आणि संचालक, भूमी अभिलेख (महाराष्ट्र राज्य) यांच्या पुणे येथील कार्यालयावर ‘आक्रोश मोर्चा’ काढण्यात येणार आहे.
जर शासनाने या आंदोलनाची दखल घेऊन मागण्या मान्य केल्या नाहीत, तर २ मार्चपासून ‘बेमुदत कामबंद आंदोलन’ करण्याचा इशारा कर्मचारी संघटनेने दिला आहे. यामुळे मोजणी प्रक्रिया पूर्णपणे कोलमडण्याची भीती व्यक्त केली जात आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
15:20 25-02-2026
