रत्नागिरी परिमंडलात वीज ग्राहकांकडे २५.९१ कोटींची थकबाकी; महावितरणकडून कडक कारवाईचा इशारा

रत्नागिरी | प्रतिनिधी विजेचा वापर करूनही देयकांचा नियमित भरणा न करणाऱ्या ग्राहकांविरुद्ध महावितरणने आता आक्रमक पवित्रा घेतला आहे. रत्नागिरी परिमंडलातील (रत्नागिरी व सिंधुदुर्ग) सुमारे १ लाख ६७ हजार ८२५ ग्राहकांकडे तब्बल २५ कोटी ९१ लाख रुपयांची थकबाकी असून, थकीत देयकांमुळे गेल्या दोन महिन्यांत १,१८२ ग्राहकांचा वीजपुरवठा खंडित करण्यात आला आहे.

थकबाकीचा तपशील (वर्गवारीनुसार):

महावितरणने दिलेल्या माहितीनुसार, घरगुती ग्राहकांपासून ते औद्योगिक ग्राहकांपर्यंत सर्वच स्तरावर मोठी थकबाकी आहे:

विभागनिहाय स्थिती:

• रत्नागिरी जिल्हा: रत्नागिरी, चिपळूण आणि खेड विभागात एकूण १२ कोटी ७६ लाख रुपयांची थकबाकी आहे. थकबाकीमुळे जिल्ह्यातील ७०८ ग्राहकांचा वीजपुरवठा खंडित करण्यात आला आहे.
• सिंधुदुर्ग जिल्हा: कणकवली आणि कुडाळ विभागात एकूण १३ कोटी १६ लाख रुपयांची थकबाकी आहे. येथे ४७४ ग्राहकांवर वीज कापण्याची कारवाई झाली आहे.

सुट्टीच्या दिवशीही वीजबिल भरणा केंद्रे सुरू

मार्च अखेरची वसुली आणि ग्राहकांची सोय लक्षात घेऊन, रत्नागिरी व सिंधुदुर्ग जिल्ह्यातील महावितरणची अधिकृत वीजबिल भरणा केंद्रे मार्च २०२६ अखेरपर्यंत शनिवार, रविवार आणि सार्वजनिक सुट्टीच्या दिवशीही कार्यालयीन वेळेत सुरू राहणार आहेत.

ऑनलाइन पेमेंटवर सवलत

महावितरणने ग्राहकांना घरबसल्या बिल भरण्याचे आवाहन केले आहे:

1. डिजिटल सवलत: वेबसाइट किंवा मोबाईल ॲपद्वारे ऑनलाइन बिल भरल्यास ०.२५ टक्के सूट मिळते.
2. RTGS/NEFT सुविधा: ५ हजार रुपयांपेक्षा जास्त बिल असलेल्या लघुदाब ग्राहकांसाठी ही सुविधा उपलब्ध आहे.
3. वेबसाइट: www.mahadiscom.in

महावितरणचे आवाहन: “कटू कारवाई टाळण्यासाठी ग्राहकांनी आपली थकीत देयके त्वरित भरावीत, अन्यथा वीजपुरवठा खंडित करण्याची मोहीम अधिक तीव्र केली जाईल.”