रत्नागिरी: शहरातील गोखले नाका परिसरात मंगळवारी दुपारी एक अत्यंत दुर्दैवी घटना घडली. दूध आणण्यासाठी गेलेल्या रमाकांत महादेव माळवदे (वय ८३) या वृद्धाचा दुकानातच चक्कर येऊन पडल्याने मृत्यू झाला. या घटनेमुळे राधाकृष्ण नाका परिसरात शोककळा पसरली आहे.
नेमकी घटना काय?
मिळालेल्या माहितीनुसार, राधाकृष्ण नाका येथील रहिवासी असलेले रमाकांत माळवदे यांना मंगळवारी सकाळपासून पोट खराब असल्याने अस्वस्थ वाटत होते. दुपारी २:३० वाजण्याच्या सुमारास ते घरून दूध आणण्यासाठी गोखले नाका येथील संसारे यांच्या दुकानात गेले होते.
- दुकानात असतानाच त्यांना अचानक चक्कर आल्यासारखे वाटू लागले.
- परिस्थितीचे गांभीर्य ओळखून दुकानदाराने त्यांना तातडीने बसण्यासाठी टेबल दिले आणि पिण्यासाठी पाणीही दिले.
- मात्र, पाणी पिण्यापूर्वीच त्यांना पुन्हा जोरात चक्कर आली आणि ते जागीच कोसळले.
उपचारापूर्वीच मयत घोषित
घटनेची माहिती मिळताच नातेवाईकांनी तातडीने घटनास्थळी धाव घेतली. माळवदे यांची कोणतीही हालचाल होत नसल्याचे पाहून त्यांना रिक्षातून तातडीने जिल्हा शासकीय रुग्णालयात दाखल करण्यात आले. मात्र, डॉक्टरांनी तपासणी अंती सायंकाळी ४ वाजता त्यांना ‘उपचारापूर्वीच मयत’ घोषित केले.
पोलीस नोंद
या घटनेची माहिती मृताच्या नातवाने दिल्यानंतर रत्नागिरी शहर पोलिसांनी या प्रकरणाची दखल घेतली आहे. पोलिसांनी भारतीय नागरिक सुरक्षा संहिता कलम १९४ अन्वये आकस्मिक मृत्यूची नोंद केली असून पुढील तपास सुरू आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
15:15 26-02-2026
