चिपळूण (प्रतिनिधी): आतापर्यंत पिकअप किंवा टेम्पोच्या माध्यमातून जनावरांची तस्करी होत असल्याचे समोर आले होते, मात्र आता तस्करांनी नवी ‘शक्कल’ लढवली आहे. चिपळूण तालुक्यातील परशुराम (दुर्गवाडी) परिसरात चक्क एका आलिशान काळ्या रंगाच्या झायलो गाडीतून जनावरांची तस्करी करण्याचा धक्कादायक प्रकार उघडकीस आला आहे. तस्करांनी जनावरांना गुंगीचे औषध देऊन पळवून नेण्याचा प्रयत्न केला असून, या घटनेमुळे परिसरात तणावाचे वातावरण निर्माण झाले होते.
नेमकी घटना काय?
गुरुवारी पहाटेच्या सुमारास ही घटना घडली. फिर्यादी सचिन शशिकांत पावसकर (वय ३३, व्यवसाय: इलेक्ट्रिशियन) हे मुंबईहून भाडे सोडून गावी परतले होते. घरासमोरील कंपाऊंडमध्ये गाडी उभी करून ते मोबाईल बघत बसले असताना, त्यांना एक काळ्या रंगाची संशयास्पद झायलो गाडी दिसली. संशय बळावल्याने त्यांनी गावातील ७-८ मित्रांना तातडीने बोलावून घेतले.
परिसरात सात ते आठ जनावरे दिसून आल्याने सर्व ग्रामस्थ कठड्याच्या मागे दबा धरून बसले होते. काही वेळाने जनावरांच्या हंबरण्याचा आवाज आल्यावर ग्रामस्थ त्या दिशेने धावले. ग्रामस्थांना येताना पाहून तस्करांनी झायलो गाडी वेगाने पळवून नेली.
धोकादायक पाठलाग आणि तस्करांचे पलायन
ग्रामस्थांनी तात्काळ आपल्या बोलेरो गाडीने तस्करांचा पाठलाग केला. पाठलाग दरम्यान तस्करांची गाडी टप्प्यात येताच ग्रामस्थांनी दगडफेक करून झायलोची मागील काचही फोडली. मात्र, तस्कर अत्यंत वेगाने लोटे एमआयडीसीच्या दिशेने पळून जाण्यात यशस्वी झाले. या गाडीतून अंदाजे १० हजार रुपये किमतीची एक तांबड्या रंगाची गाय गुंगीचे औषध देऊन पळवून नेण्यात आली आहे.
पाच जनावरे आढळली बेशुद्ध
तस्कर पसार झाल्यानंतर ग्रामस्थांनी घटनास्थळाची पाहणी केली असता, तिथे चार गाई आणि एक बैल अशी एकूण पाच जनावरे बेशुद्ध अवस्थेत आढळली. या मुक्या प्राण्यांना गुंगीचे औषध देऊन बेशुद्ध करण्यात आले होते. सध्या या सर्व जनावरांवर उपचार सुरू आहेत.
पोलीस कारवाई आणि गुन्हा दाखल
घटनेची माहिती मिळताच चिपळूण पोलिसांनी घटनास्थळी धाव घेत पंचनामा केला. परिसरातील सीसीटीव्ही फुटेज तपासून आरोपींचा शोध घेतला जात आहे. पोलिसांनी या प्रकरणी खालील कायद्यांन्वये अज्ञात आरोपींविरुद्ध गुन्हा दाखल केला आहे:
- प्राण्यांना क्रूरतेने वागवण्यास प्रतिबंधक अधिनियम: कलम ११ (१), (क), (ड)
- भारतीय न्याय संहिता (BNS): अधिनियम ३०३ (१), ३ (५)
या प्रकरणाचा अधिक तपास पोलीस उपनिरीक्षक भरतेश हारूगिरे करत आहेत.
सावधान! आपल्या परिसरात अशा प्रकारे संशयास्पद वावरणाऱ्या आलिशान गाड्यांकडे दुर्लक्ष करू नका. जनावरांची तस्करी रोखण्यासाठी ग्रामस्थांनी सतर्क राहावे, असे आवाहन पोलिसांनी केले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:59 27-02-2026
