कोलकाता: संजू सॅमसनच्या ‘वन मॅन शो’च्या जोरावर भारतीय संघाने आयसीसी टी-२० वर्ल्ड कप २०२६ मध्ये ऐतिहासिक विजयाची नोंद केली आहे. कोलकात्याच्या ईडन गार्डन्स मैदानावर झालेल्या अटीतटीच्या सामन्यात भारताने वेस्ट इंडिजचा ५ विकेट्स राखून पराभव केला. या विजयासह टीम इंडियाने सहाव्यांदा टी-२० वर्ल्ड कपच्या सेमीफायनलमध्ये प्रवेश करण्याचा विक्रम प्रस्थापित केला आहे.
संजूची ‘विराट’ खेळी; ९७ धावांचा पाऊस
वेस्ट इंडिजने विजयासाठी दिलेल्या १९६ धावांच्या महाकाय लक्ष्याचा पाठलाग करताना भारतीय फलंदाजीची धुरा एकट्या संजू सॅमसनने वाहिली. संजूने अवघ्या ५० चेंडूत १२ चौकार आणि ४ षटकारांच्या मदतीने नाबाद ९७ धावांची अविस्मरणीय खेळी केली. विशेष म्हणजे, संजू व्यतिरिक्त एकाही भारतीय फलंदाजाला ३० धावांचा टप्पा ओलांडता आला नाही. संजूनंतर तिलक वर्माने केलेली १५ चेंडूतील २७ धावांची खेळी ही दुसरी सर्वोच्च धावसंख्या ठरली.
वर्ल्ड कपच्या इतिहासातील सर्वात मोठा ‘रन चेस’
टी-२० वर्ल्ड कपमध्ये भारतीय संघाने प्रथमच एवढ्या मोठ्या धावसंख्येचा यशस्वी पाठलाग केला आहे. भारताने आपल्या जुन्या विक्रमांना मागे टाकत एक नवा इतिहास रचला आहे.
टीम इंडियाचे टी-२० वर्ल्ड कपमधील यशस्वी धावपळ (Highest Run Chase):
| सामना | वर्ष | धावसंख्या |
| भारत वि. वेस्ट इंडिज | २०२६ | १९६ |
| भारत वि. दक्षिण आफ्रिका | २०१४ | १७३ |
| भारत वि. ऑस्ट्रेलिया | २०१६ | १६१ |
| भारत वि. पाकिस्तान | २०२२ | १६० |
| भारत वि. बांगलादेश | २०१४ | १३९ |
वेस्ट इंडिजचा स्पर्धेतील प्रवास संपला
प्रथम फलंदाजी करताना वेस्ट इंडिजने १९५ धावांचे तगडे आव्हान उभे केले होते. विंडीजकडून शमार जोसेफ आणि जेसन होल्डर यांनी प्रत्येकी २ विकेट्स घेतल्या, तर अकिल हुसेनने १ बळी मिळवला. मात्र, संजू सॅमसनच्या झंझावातासमोर कॅरेबियन गोलंदाजी दुबळी ठरली. या पराभवासोबतच वेस्ट इंडिजचे स्पर्धेतील आव्हान संपुष्टात आले आहे.
सेमीफायनलचा थरार: भारत विरूद्ध इंग्लंड!
सुपर-८ फेरीतील पहिल्या गटात दुसऱ्या स्थानावर राहत भारताने सेमीफायनलचे तिकीट पक्के केले आहे. आता अंतिम फेरी गाठण्यासाठी टीम इंडियाचा सामना दुसऱ्या गटातील अव्वल स्थानी असलेल्या इंग्लंडशी होणार आहे. हा हाय-व्होल्टेज सामना मुंबईच्या ऐतिहासिक वानखेडे स्टेडियमवर रंगणार आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:17 02-03-2026
