रत्नागिरी: आंघोळीसाठी पाणी गरम करत असताना अचानक लागलेल्या आगीत गंभीररीत्या भाजलेल्या एका ६७ वर्षीय वृद्धेचा दुर्दैवी मृत्यू झाला. रत्नागिरी जिल्हा शासकीय रुग्णालयात उपचारादरम्यान त्यांची प्राणज्योत मालवली. शेवंती बाळकृष्ण चौधरी (वय ६७, रा. मोठी गोडीबाव, हर्णे, ता. दापोली) असे मृत महिलेचे नाव आहे.
नेमकी घटना काय?
मिळालेल्या माहितीनुसार, ५ मार्च रोजी शेवंती चौधरी या हर्णे येथील आपल्या राहत्या घरी आंघोळीसाठी पाणी गरम करत होत्या. यावेळी अचानक आगीचा मोठा भडका उडाला. आगीची तीव्रता इतकी होती की, क्षणात त्यांच्या अंगावरील कपड्यांनी पेट घेतला. या भीषण आगीत त्या गंभीररीत्या भाजल्या गेल्या.
उपचारादरम्यान मृत्यू
घटनेनंतर कुटुंबीयांनी त्यांना तातडीने हर्णे येथील खासगी रुग्णालयात नेले. तिथून त्यांना पुढील उपचारासाठी दापोली ग्रामीण रुग्णालयात हलवण्यात आले. मात्र, त्यांची प्रकृती चिंताजनक असल्याने डॉक्टरांच्या सल्ल्यानुसार त्यांना १०८ रुग्णवाहिकेने तात्काळ रत्नागिरी जिल्हा शासकीय रुग्णालयात दाखल करण्यात आले. जिल्हा रुग्णालयात झुंज सुरू असतानाच ५ मार्च रोजी सकाळी ११ वाजण्याच्या सुमारास वैद्यकीय अधिकाऱ्यांनी त्यांना मृत घोषित केले.
पोलीस दप्तरी नोंद
या हृदयद्रावक घटनेची नोंद ९ मार्च रोजी दुपारी १२ वाजता रत्नागिरी पोलीस ठाण्यात करण्यात आली आहे. पोलिसांनी याप्रकरणी बी.एन.एस.एस. १९४ अन्वये आकस्मिक मृत्यूची नोंद केली आहे. या घटनेमुळे हर्णे परिसरात मोठी हळहळ व्यक्त केली जात आहे.
सावधानता बाळगा: घरात चुलीवर किंवा गॅसवर पाणी गरम करत असताना विशेष काळजी घ्यावी. आगीचा भडका उडू नये यासाठी सुरक्षित अंतर आणि सुती कपड्यांचा वापर करणे हिताचे ठरते.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:38 11-03-2026
