देवरुख (रत्नागिरी): जागतिक महिला दिनाचे औचित्य साधून आंबेड बुद्रुक येथे ‘अंतरा फाउंडेशन’ आणि ‘भारतीय जनता पार्टी’ यांच्या संयुक्त विद्यमाने महिलांसाठी विशेष कौशल्य विकास मार्गदर्शन शिबिर आणि सन्मान सोहळ्याचे आयोजन करण्यात आले होते. या कार्यक्रमातून ग्रामीण भागातील महिलांना स्वावलंबी बनवण्याचा मंत्र देण्यात आला.
महिलांना मिळाले रोजगाराभिमुख प्रशिक्षण
अंतरा फाउंडेशनच्या माध्यमातून आयोजित या शिबिरात महिलांना घरगुती सजावटीचे साहित्य तयार करण्याचे प्रशिक्षण देण्यात आले. यामध्ये प्रामुख्याने:
- डोअर हँगिंग (दारावरील तोरणे)
- रांगोळी मॅट
- प्लास्टिक फुलांचे आकर्षक गजरे यांसारख्या वस्तू तयार करण्याचे प्रात्यक्षिक दाखवण्यात आले. या कौशल्य विकासामुळे महिलांना घरबसल्या रोजगार उपलब्ध होण्यास मदत होणार आहे.
कर्तृत्ववान महिलांचा सन्मान
समाजासाठी उत्कृष्ट कामगिरी करणाऱ्या महिलांना यावेळी मान्यवरांच्या हस्ते सन्मानित करण्यात आले. सन्मानित महिलांमध्ये पुढील नावांचा समावेश होता: १) फराह मुजावर (सोनगिरी): अंगणवाडी सेविका म्हणून सामाजिक क्षेत्रात केलेल्या उल्लेखनीय कार्याबद्दल. २) कामिनी पडवळ (कोळंबे): आशा सेविका आणि होमगार्ड अशी दुहेरी जबाबदारी जिद्दीने सांभाळल्याबद्दल. ३) कु. चैत्राली गेल्ये: उत्कृष्ट कबड्डी खेळाडू म्हणून खिलाडू वृत्ती जपल्याबद्दल.
मान्यवरांची उपस्थिती आणि शुभेच्छा
भाजपा महिला जिल्हाध्यक्षा सौं. वर्षाताई ढेकणे यांनी या उपक्रमाचे कौतुक करताना सर्व महिलांना जागतिक महिला दिनाच्या शुभेच्छा दिल्या. महिलांनी स्वतःच्या पायावर उभे राहणे काळाची गरज असल्याचे त्यांनी नमूद केले.
यावेळी व्यासपीठावर देवरुख शहर अध्यक्षा सौं. शीतल पंडित, उपाध्यक्ष सौं. सुमन झगडे, तालुका सरचिटणीस सौं. रोहिणी सुर्वे, रत्नागिरी शहर अध्यक्ष श्री. दादा ढेकणे, अंतरा फाउंडेशनचे सचिव तथा भाजपा तालुका सरचिटणीस श्री. राजेश आंबेकर, उपाध्यक्षा सौं. सरिता आंबेकर उपस्थित होते.
आयोजन आणि आभार
या कार्यक्रमाच्या यशस्वी आयोजनासाठी सौं. पूजा मुळ्ये, सौं. श्वेता मादूस्कर, सौं. अपर्णा शिगवण, सौं. साक्षी शिगवण, सौं. कविता टाकळे, सौं. रेश्मा मोहिते यांच्यासह मोठ्या संख्येने महिला वर्ग उपस्थित होता. कार्यक्रमाचे आभार प्रदर्शन अंतरा फाउंडेशनच्या अध्यक्षा तथा भाजपा महिला जिल्हा सरचिटणीस सौं. नुपुरा मुळ्ये यांनी केले.
