लांजा (रत्नागिरी): रत्नागिरी जिल्ह्यातील लांजा तालुक्यातील भांबेड कुडेवाडी येथे देवस्थानच्या वादातून एका ६३ वर्षीय वृद्धाला अमानुष मारहाण आणि शिवीगाळ केल्याची धक्कादायक घटना घडली आहे. गावातील जांगल देवाचे जुने मंदिर पाडून नवीन मंदिर बांधण्याकरिता नारळ ठेवल्याचा राग मनात धरून पाच जणांनी संगनमत करून ही मारहाण केली. या प्रकरणी लांजा पोलीस ठाण्यात पाच जणांविरुद्ध विविध कलमान्वये गुन्हा दाखल करण्यात आला आहे.
नेमकी घटना काय?
भांबेड कुडेवाडी येथील सुभाष शामकांत मोरे (६३) यांनी दिलेल्या फिर्यादीनुसार, गावातील जांगल देवाचे जुने मंदिर पाडून त्या जागी नवीन मंदिर उभारण्याचा निर्णय गावाने घेतला होता. या निर्णयानुसार, गावाच्या सांगण्यावरून सुभाष मोरे यांनी विधिवत नारळ ठेवला होता. मात्र, ही बाब गावातीलच काही व्यक्तींना रुचली नाही.
बुधवारी, ११ मार्च रोजी रात्री १०.१५ च्या सुमारास संशयित आरोपींनी सुभाष मोरे यांच्या घरी जाऊन बेकायदा जमाव जमवला. “आमच्या विरोधात नारळ का ठेवला?” असे म्हणत त्यांनी मोरे यांना शिवीगाळ करण्यास सुरुवात केली. वादाचे रूपांतर हाणामारीत झाले आणि आरोपींनी मोरे यांना लाथाबुक्क्यांनी व हाताने बेदम मारहाण केली.
पाच जणांविरुद्ध गुन्हा दाखल
या मारहाणीत सुभाष मोरे यांच्या उजव्या हाताच्या करंगळीला गंभीर दुखापत झाली आहे. या प्रकरणी लांजा पोलिसांनी खालील पाच जणांविरुद्ध गुन्हा नोंदवला आहे: १. श्रीधर शंकर मोरे (८०) २. तुळशीराम शंकर मोरे (७२) ३. तेजस तुळशीराम मोरे (३५) ४. श्रध्देश तुळशीराम मोरे उर्फ बारक्या (३२) ५. गणेश जयराम मोरे (५५)
पोलिसांची कारवाई
मारहाणीसोबतच संशयितांनी फिर्यादीला ठार मारण्याची धमकीही दिली आहे. लांजा पोलिसांनी या पाचही जणांविरुद्ध भारतीय न्याय संहिता (BNS) कलम १८९(२), १९१(२), १९०, ११५(२), ३५२ आणि ३५१(२) नुसार गुन्हा दाखल केला आहे. पोलीस निरीक्षक निळकंठ बगळे यांच्या मार्गदर्शनाखाली पोलीस हेड कॉन्स्टेबल दिनेश आखाडे या प्रकरणाचा अधिक तपास करत आहेत.
थोडक्यात माहिती:
- ठिकाण: भांबेड कुडेवाडी, लांजा.
- कारण: नवीन मंदिर बांधण्यासाठी नारळ ठेवल्याचा वाद.
- कलमे: भारतीय न्याय संहितेच्या विविध कलमान्वये गुन्हा.
- जखमी: सुभाष शामकांत मोरे (वय ६३).
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:00 14-03-2026
