चिपळूण: भरघोस परताव्याचे आमिष दाखवून गुंतवणूकदारांची फसवणूक करणाऱ्या टीडब्ल्यूजे (TWJ) कंपनीचा मुख्य व्यवस्थापक समीर सुभाष नार्वेकर आणि संचालक नेहा समीर नार्वेकर या दाम्पत्याला रत्नागिरी आर्थिक गुन्हे शाखेने अखेर अटक केली आहे. शनिवारी या दोघांना चिपळूण न्यायालयात हजर केले असता, न्यायालयाने त्यांना १० दिवसांची पोलीस कोठडी सुनावली आहे.
नेमके प्रकरण काय?
चिपळूणमधील बायपास मार्गावर आलिशान कार्यालय थाटून टीडब्ल्यूजे कंपनीने अनेकांना आकर्षित केले होते. दरमहा ३ ते ४ टक्के परतावा देण्याचे आमिष दाखवत या कंपनीने शेकडो गुंतवणूकदारांकडून कोट्यवधी रुपये जमा केले. मात्र, काही काळानंतर परतावा देणे बंद करून या दाम्पत्याने गुंतवणूकदारांना आर्थिक गंडा घातला.
या प्रकरणी तक्रारदार प्रतीक माटे यांची ३ लाख ५० हजार आणि त्यांच्या बहिणीची २५ लाख, अशी एकूण २८ लाख ५० हजार रुपयांची फसवणूक झाल्याचे उघडकीस आले होते. त्यानंतर चिपळूण पोलीस ठाण्यात गुन्हा दाखल करण्यात आला होता.
तपासाची चक्रे फिरली; फसवणुकीची व्याप्ती वाढली
या प्रकरणाचा तपास रत्नागिरी आर्थिक गुन्हे शाखेकडे (EOW) वर्ग करण्यात आला आहे. तपासादरम्यान फसवणुकीचा हा आकडा कोट्यवधींच्या घरात जाण्याची शक्यता वर्तवण्यात येत आहे. यापूर्वीच या प्रकरणात संकेश घाग याला अटक करण्यात आली असून, नार्वेकर दाम्पत्यावर राज्यातील विविध पोलीस ठाण्यांत गुन्हे दाखल आहेत. काही दिवसांपूर्वी त्यांना ठाणे येथून ताब्यात घेण्यात आले होते, त्यानंतर शनिवारी रत्नागिरी पथकाने त्यांना रीतसर अटक केली.
न्यायालयाबाहेर गुंतवणूकदारांची मोठी गर्दी
नार्वेकर दाम्पत्याला न्यायालयात हजर केले जाणार असल्याची माहिती मिळताच, फसवणूक झालेल्या गुंतवणूकदारांनी न्यायालयाच्या आवारात मोठी गर्दी केली होती. गुंतवणूकदारांचा संताप पाहता कोणताही अनुचित प्रकार घडू नये यासाठी पोलिसांनी कडक बंदोबस्त तैनात केला होता.
आलिशान कार्यालय आता बंद
एकेकाळी मोठा कर्मचारी वर्ग आणि चकचकीत फर्निचरने सजलेले टीडब्ल्यूजेचे कार्यालय आता बंद पडले आहे. आर्थिक गुन्हे शाखेने या कार्यालयाची झडती घेऊन महत्त्वाची कागदपत्रे आणि पुरावे ताब्यात घेतले आहेत.
महत्त्वाची टीप: जर तुमचीही अशा प्रकारे फसवणूक झाली असेल, तर तात्काळ नजीकच्या पोलीस ठाण्याशी किंवा आर्थिक गुन्हे शाखेशी संपर्क साधण्याचे आवाहन करण्यात आले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:17 16-03-2026
