रत्नागिरी: उत्तर प्रदेशातील लखनऊ येथे पार पडलेल्या चौथ्या राष्ट्रीय धनुर्विद्या स्पर्धेत रत्नागिरीची सुकन्या मृदुला संजीवनी साईप्रसाद मोरे हिने आपल्या अष्टपैलू खेळाचे प्रदर्शन करत देशात १४ वे रँकिंग पटकावले आहे. विशेष म्हणजे, या स्पर्धेत तिने आंतरराष्ट्रीय कीर्तीची धनुर्धर शीतलदेवी हिच्याशी दोन हात करत क्रीडा क्षेत्राचे लक्ष वेधून घेतले.
अर्जुन पुरस्कार विजेत्या शीतलदेवीशी मुकाबला
मृदुलाने स्पर्धेच्या सुरुवातीपासूनच अत्यंत आत्मविश्वासाने आणि अचूकपणे बाण सोडत पहिल्या फेरीत आपला दबदबा निर्माण केला. पहिल्या राऊंडमधील तिच्या उत्कृष्ट कामगिरीमुळे दुसऱ्या राऊंडमध्ये तिचा सामना थेट अर्जुन पुरस्कार विजेती धनुर्धर शीतलदेवी हिच्याशी झाला. बलाढ्य आणि अनुभवी प्रतिस्पर्धी समोर असतानाही न डगमगता मृदुलाने दिलेली झुंज उपस्थितांच्या कौतुकास पात्र ठरली. तिच्या या जिद्दीच्या जोरावरच तिने राष्ट्रीय पातळीवर मानाचे १४ वे स्थान मिळवले आहे.
प्रशिक्षण आणि मार्गदर्शन
मूळची रत्नागिरीची असलेल्या मृदुलाच्या या यशामागे कठोर परिश्रम आणि योग्य मार्गदर्शनाचा मोठा वाटा आहे. तिला सातारा येथील ‘दृष्टी आर्चरी अकॅडमी’चे प्रसिद्ध प्रशिक्षक प्रवीण सावंत आणि सायली सावंत यांचे मोलाचे मार्गदर्शन लाभले आहे. त्यांच्या मार्गदर्शनाखाली मृदुलाने धनुर्विद्येचे बारकावे आत्मसात केले असून तिचे कौशल्य राष्ट्रीय स्तरावर सिद्ध केले आहे.
रत्नागिरीच्या शिरपेचात मानाचा तुरा
मृदुलाच्या या घवघवीत यशामुळे रत्नागिरी जिल्ह्याच्या शिरपेचात मानाचा तुरा रोवला गेला आहे. एका लहान शहरातून येऊन राष्ट्रीय स्तरावर दिग्गज खेळाडूंना टक्कर देणाऱ्या मृदुलावर सध्या सर्वच स्तरांतून कौतुकाचा वर्षाव होत आहे. अनेक क्रीडाप्रेमी आणि मान्यवरांनी तिच्या पुढील वाटचालीस शुभेच्छा दिल्या आहेत.
यशाचा टप्पा: कंपाउंड प्रकारातील ही कामगिरी मृदुलाच्या भविष्यातील आंतरराष्ट्रीय कारकिर्दीसाठी अत्यंत महत्त्वाची मानली जात आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:57 16-03-2026
