रत्नागिरी: रत्नागिरी शहरातील खराब रस्त्यांमुळे त्रस्त असलेल्या नागरिकांसाठी एक आनंदाची बातमी आहे. गेल्या काही महिन्यांपासून सुरू असलेली रस्ते दुरुस्तीची कामे आता अंतिम टप्प्यात आली असून, लवकरच शहरवासीयांचा प्रवास सुखकर होणार आहे. विशेषतः शिमगोत्सवाच्या पार्श्वभूमीवर पालखी मार्गावरील कामांना प्रशासनाकडून प्राधान्य देण्यात आले आहे.
डांबरीकरण आणि पॅचवर्कवर भर
शहरातील ज्या ठिकाणी रस्त्यांची अवस्था अत्यंत बिकट होती, तिथे संपूर्ण रस्त्याचे डांबरीकरण करण्यात येत आहे. तर काही ठिकाणी पॅचवर्क आणि डांबर-खडीच्या सहाय्याने खड्डे भरण्याचे काम युद्धपातळीवर सुरू आहे. दररोज नियोजित वेळेत ही कामे पूर्ण करण्यावर भर दिला जात असल्याचे चित्र सध्या रत्नागिरीत पाहायला मिळत आहे.
निवडणुकीतील आश्वासनाची पूर्तता
रत्नागिरी शहरातील रस्त्यांची दुरवस्था हा नगर परिषदेच्या निवडणुकीत प्रचाराचा मुख्य मुद्दा ठरला होता. त्यावेळी सत्ताधारी शिवसेनेच्या नेत्यांनी आश्वासन दिले होते की, निवडणूक संपल्यानंतर दोन महिन्यांच्या आत रस्त्यांची कामे मार्गी लावली जातील. दिलेल्या शब्दाला जागत, नगर परिषदेच्या निवडणुका पार पडताच रस्ते कामांना प्रत्यक्ष सुरुवात झाली आणि आता ही कामे पूर्णत्वाकडे झुकली आहेत.
ठळक मुद्दे:
- अंतिम टप्पा: रस्ते दुरुस्तीची ७०-८०% कामे पूर्ण.
- शिमगा स्पेशल: पालखी मार्गांना प्राधान्याने दुरुस्ती.
- आश्वासनाची पूर्तता: निवडणुकीनंतर दोन महिन्यात कामाचा धडाका.
- कामाचे स्वरूप: डांबरीकरण, पॅचवर्क आणि खड्डे भरणे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
15:26 16-03-2026
