रत्नागिरी जिल्ह्यात १० हजारांहून अधिक ‘एनसीएमसी’ कार्ड नोंदणी पूर्ण; एसटी सवलतीसाठी कार्ड आता अनिवार्य!

रत्नागिरी: महाराष्ट्र राज्य परिवहन मंडळाच्या (MSRTC) बसेसमधून सवलतीच्या दरात प्रवास करणाऱ्या प्रवाशांसाठी आता ‘नॅशनल कॉमन मोबिलिटी कार्ड’ (NCMC) अनिवार्य करण्यात आले आहे. रत्नागिरी जिल्ह्यात या कार्डच्या नोंदणीला वेग आला असून, आतापर्यंत १० हजारांहून अधिक प्रवाशांनी आपली नोंदणी पूर्ण केली आहे. विशेषतः रत्नागिरी आगारातच १ हजारहून अधिक कार्ड्सची नोंदणी झाली आहे.

सवलत हवी असेल तर स्मार्ट कार्ड हवेच!

एसटी प्रशासनाने स्पष्ट केले आहे की, यापूर्वी आधार कार्ड दाखवून मिळणारी प्रवासातील सवलत आता केवळ एनसीएमसी (NCMC) स्मार्ट कार्डद्वारेच मिळेल. ज्या प्रवाशांकडे हे कार्ड नसेल, त्यांची सवलत बंद होण्याची शक्यता आहे. बोगस आधार कार्ड दाखवून प्रवास करणाऱ्यांवर आळा घालण्यासाठी आणि प्रवासाची प्रक्रिया डिजिटल करण्यासाठी हा निर्णय घेण्यात आला आहे.

नोंदणीसाठी प्रवाशांच्या रांगा

सध्या रत्नागिरी जिल्ह्यातील विविध एसटी आगारांमध्ये कार्ड काढण्यासाठी प्रवाशांची मोठी गर्दी होत आहे. भर उन्हात ज्येष्ठ नागरिक आणि महिलांना तासन् तास रांगेत उभे राहावे लागत असल्याने काही प्रमाणात संतापही व्यक्त केला जात आहे.

नोंदणीची महत्त्वाची माहिती:

• वेळ: सकाळी ९:३० ते दुपारी १:०० आणि दुपारी २:०० ते ४:३०.
• सुट्टी: रविवारी नोंदणी प्रक्रिया बंद राहील.
• कुठे सुरू आहे: रत्नागिरी, दापोली, मंडणगड, गुहागर, लांजा, राजापूर, खेड, चिपळूण या बसस्थानकांवर एजंटद्वारे नोंदणी सुरू आहे.
• नोंदणी बाकी: अद्याप संगमेश्वर आणि देवरुख बसस्थानकात नोंदणी सुरू झालेली नाही.

“रत्नागिरी आगारात दररोज १०० हून अधिक जणांची नोंदणी होत आहे. कार्ड अनिवार्य केल्यामुळे नोंदणीसाठी गर्दी वाढत असून प्रवाशांनी लवकरात लवकर आपली नोंदणी पूर्ण करून घ्यावी.” — संदीप चव्हाण, स्मार्ट कार्ड नोंदणी एजंट, रत्नागिरी.

कोणाला मिळणार सवलत?

६५ वर्षांवरील ज्येष्ठ नागरिक, ७५ वर्षांवरील (अमृत ज्येष्ठ नागरिक) आणि महिला यांच्यासह इतर सर्व पात्र सवलतधारकांना या स्मार्ट कार्डचा लाभ घेता येईल. मागील महिन्याच्या २१ तारखेपासून ही नोंदणी प्रक्रिया राज्यभर सुरू झाली आहे.

प्रवाशांना आवाहन: सवलतीचा लाभ अखंडितपणे मिळवण्यासाठी आपल्या जवळच्या बसस्थानकावर जाऊन आवश्यक कागदपत्रांसह एनसीएमसी कार्डची नोंदणी त्वरित करून घ्यावी.

दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
17:58 17-03-2026