रत्नागिरी: कोकणची सांस्कृतिक राजधानी असलेल्या रत्नागिरी शहरात यंदाही हिंदू नववर्षाचे स्वागत अत्यंत उत्साहात आणि पारंपरिक पद्धतीने केले जाणार आहे. श्रीदेव भैरी जुगाई नवलाई पावणाई तृण बिंदुकेश्वर संस्था आणि श्री पतितपावन मंदिर संस्था यांच्या संयुक्त विद्यमाने आयोजित ‘हिंदू नववर्ष स्वागत यात्रे’चे हे २२ वे वर्ष असून, १९ मार्च २०२६ रोजी शहरातून ही भव्य यात्रा निघणार आहे.
सूर्योदयाला फटाक्यांची आतषबाजी आणि स्वागत
चैत्र शुद्ध प्रतिपदा शके १९४८ (युगाब्द ५१२८) निमित्त गुरुवारी, १९ मार्च रोजी सकाळी ६.३० वाजता सूर्योदयाच्या वेळी फटाक्यांची भव्य आतषबाजी करून नववर्षाचे स्वागत करण्याचे आवाहन करण्यात आले आहे. तसेच नागरिकांनी आपापल्या भागात सजावट करून आणि रांगोळ्या काढून हे नववर्ष साजरे करावे, अशा सूचना आयोजकांनी दिल्या आहेत.
स्वागत यात्रेचा मार्ग आणि वेळ
स्वागत यात्रेची सुरुवात सकाळी ९.३० वाजता होईल. मुख्य स्वागत यात्रेसाठी सर्व भाविकांनी सकाळी ९.०० वाजता श्रीदेव भैरी मंदिरात गाऱ्हाणे घालण्यासाठी पारंपरिक वेशभूषेत उपस्थित राहणे अपेक्षित आहे.
- मुख्य मार्ग: श्रीदेव भैरी मंदिर – खालची आळी – मुरलीधर मंदिर – विठ्ठल मंदिर – गोखले नाका – मारुती आळी – जयस्तंभ – राम आळी – राधाकृष्ण नाका – गोखले नाका – पतितपावन मंदिर.
- मारुती मंदिर उपमार्ग: सकाळी ९.३० वाजता मारुती मंदिर येथून निघणारी दुसरी स्वागत यात्रा जयस्तंभ येथे मुख्य यात्रेत सामील होईल.
पारंपरिक शिस्त आणि वैशिष्ट्ये
या स्वागत यात्रेचे मुख्य वैशिष्ट्य म्हणजे यात गुलालाची उधळण केली जाणार नाही. सर्व सहभागींनी भारतीय पारंपरिक वेशभूषेत उपस्थित राहून शिस्तबद्ध पद्धतीने या सोहळ्याची शोभा वाढवावी, असे आवाहन संयोजक आनंद मराठे, श्री भैरी देवस्थान ट्रस्टचे अध्यक्ष रवींद्र (मुन्ना) सुर्वे आणि पतितपावन मंदिर संस्थेचे अध्यक्ष उन्मेष शिंदे यांनी केले आहे.
रत्नागिरीतील या भव्य स्वागत यात्रेमुळे शहरात चैतन्याचे वातावरण निर्माण झाले असून, हजारो नागरिक या सोहळ्याला उपस्थित राहण्याची शक्यता आहे.
