नाशिक/मुंबई: नाशिकमधील तथाकथित आध्यात्मिक गुरु अशोक खरात (Ashok Kharat) याच्यावर बलात्काराचे गंभीर आरोप झाल्यानंतर संपूर्ण महाराष्ट्रात खळबळ उडाली आहे. या प्रकरणावर माजी खासदार संभाजीराजे छत्रपती यांनी अत्यंत संतप्त प्रतिक्रिया दिली असून, खरात याच्या नावापुढे ‘कॅप्टन’ ही पदवी लावण्यावर कडक आक्षेप घेतला आहे.
‘कॅप्टन’ पद लष्कराचा सन्मान, भोंदूचा नव्हे!
संभाजीराजे छत्रपती यांनी सोशल मीडियाच्या माध्यमातून जनतेला आणि विशेषतः प्रसारमाध्यमांना जाहीर आवाहन केले आहे. त्यांनी म्हटले की, “भारतीय लष्करातील ‘कॅप्टन’ हे अत्यंत सन्मानाचे पद आहे. मेहनतीने आणि राष्ट्रभक्तीने व्यक्ती या पदापर्यंत पोहोचतो. अशोक खरात हा कधीही भारतीय सैन्यदलात किंवा नौदलात नव्हता. तो केवळ व्यापारी जहाजांवर (Merchant Navy) कर्मचारी होता. त्याने स्वतःला लावून घेतलेली ही खोटी पदवी मान्य करून आपण नकळत आपल्या सैन्यदलाचा अपमान करू नये.”
त्याच्या अंगातली मस्ती जिरवण्याची हीच वेळ
अशोक खरात याच्यावर झालेल्या आरोपांनंतर संभाजीराजे यांनी राज्य सरकारकडे कठोर कारवाईची मागणी केली आहे.
- सखोल चौकशीची मागणी: खरात याच्या संपर्कात कोणकोणते मोठे राजकीय नेते आणि उद्योजक होते, याचा तपास झाला पाहिजे.
- महिला आयोगावर निशाणा: “महिला आयोगाच्या अध्यक्षांचे या भोंदूशी संबंध आहेत, त्यांना तत्काळ पदावरून हटवावे,” अशी मागणीही त्यांनी केली.
- मुख्यमंत्र्यांना विनंती: महाराष्ट्रात अशा घटना पुन्हा घडू नयेत यासाठी मुख्यमंत्र्यांनी या प्रकरणाची गंभीर दखल घेऊन अशा भोंदूंची ‘मस्ती’ जिरवावी, असेही ते म्हणाले.
नेमकं प्रकरण काय? (Nashik Ashok Kharat Rape Case)
नाशिकमधील श्री ईशान्येश्वर मंदिर ट्रस्टचा अध्यक्ष असलेल्या अशोक खरात याला एका ३५ वर्षीय महिलेवर गुंगीचे औषध देऊन बलात्कार केल्याच्या आरोपाखाली अटक करण्यात आली आहे.
- गुन्हा दाखल: नाशिकच्या सरकारवाडा पोलीस ठाण्यात हा गुन्हा नोंदवण्यात आला आहे.
- अटक: १८ मार्च रोजी पहाटे गुन्हे शाखेने त्याला ताब्यात घेतले.
- पार्श्वभूमी: खरात हा स्वतःला कॉस्मॉलॉजी एक्स्पर्ट आणि अंकशास्त्रज्ञ म्हणून मिरवत असे. अनेक सेलिब्रिटी आणि बडे नेते त्याच्या संपर्कात होते.
महाराष्ट्राच्या प्रतिमेला काळीमा
“छत्रपती शिवाजी महाराज, शाहू, फुले, आंबेडकरांच्या महाराष्ट्रात महिलांवर अत्याचार करणाऱ्या अशा भोंदू महाराजांना थारा देऊ नये,” अशा शब्दांत संभाजीराजेंनी आपला संताप व्यक्त केला आहे. या प्रकरणामुळे आता राजकीय वर्तुळातही मोठे पडसाद उमटण्याची शक्यता आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:32 21-03-2026
