गुहागर: “पाणी आणि लिंगभाव” (Water and Gender) या संकल्पनेला मूर्त रूप देत गुहागर तालुक्यातील खामशेत ग्रामपंचायतीने एक ऐतिहासिक पाऊल उचलले आहे. जागतिक जल दिनाचे औचित्य साधून, गावातील नळ पाणीपुरवठा योजनेचे व्यवस्थापन आणि जबाबदारी आता ‘श्री दत्त कृपा स्वयंसहाय्यता महिला बचत गट’ यांच्याकडे सुपूर्द करण्यात आली आहे. महिला सक्षमीकरणाच्या दिशेने टाकलेले हे पाऊल रत्नागिरी जिल्ह्यासाठी आदर्श ठरणार आहे.
महिला सक्षमीकरणासाठी ‘जल अर्पण’
राज्य शासनाच्या सूचनेनुसार ८ मार्च (महिला दिन) ते २२ मार्च (जागतिक जल दिन) या कालावधीत ‘जल महोत्सव’ साजरा करण्यात येत आहे. या महोत्सवाचा भाग म्हणून रत्नागिरी जिल्हा परिषदेच्या मुख्य कार्यकारी अधिकारी श्रीम. वैदेही रानडे यांच्या कल्पनेतून जिल्ह्यातील नळ पाणीपुरवठा योजना महिला बचत गटांकडे सोपवण्याचा निर्णय घेण्यात आला आहे. ग्रामीण भागातील महिलांना मुख्य प्रवाहात आणणे आणि त्यांना आर्थिकदृष्ट्या सक्षम करणे हा यामागचा मुख्य उद्देश आहे.
खामशेतमध्ये ‘स्वामीत्वाचा उत्सव’
२२ मार्च २०२६ रोजी गुहागर तालुक्यातील खामशेत येथे एका विशेष कार्यक्रमाचे आयोजन करण्यात आले होते. यावेळी ग्रामपंचायत खामशेत आणि श्री दत्त कृपा महिला बचत गट यांच्यात करार करण्यात आला. या करारानुसार, योजनेची देखभाल, पाणीपट्टी वसुली आणि पाणी वाटप या सर्व बाबींची जबाबदारी आता महिला बचत गट सांभाळणार आहे. योजनेचे हस्तांतरण होताच ग्रामस्थांनी ‘स्वामीत्वाचा उत्सव’ मोठ्या उत्साहात साजरा केला.
कार्यक्रमाला मान्यवरांची उपस्थिती
या सोहळ्यासाठी गुहागर पंचायत समितीचे सभापती प्रणव पोळेकर, उपसभापती निलेश सुर्वे, सदस्या श्रीम. खैर आणि श्री. शिवगण उपस्थित होते. तसेच जिल्हा स्तरावरून कार्यकारी अभियंता श्रीम. मयुरी पाटील, गट विकास अधिकारी श्री. शिरसाट, उपअभियंता श्रीम. दिप्ती धारप, विस्तार अधिकारी श्री. शरद भांड, प्रशासक श्री. सोलकर आणि ग्रामपंचायत अधिकारी श्री. मोहिरे यांनी या उपक्रमाचे कौतुक केले.
पाणी व्यवस्थापनात महिलांचा सहभाग का महत्त्वाचा?
पाण्याचा सर्वाधिक वापर आणि गरज महिलांना असते. त्यामुळे पाण्याचे नियोजन आणि व्यवस्थापन महिलांकडे दिल्यास पाण्याचा अपव्यय टाळता येईल आणि योजना अधिक पारदर्शकपणे चालेल, असा विश्वास प्रशासनाने व्यक्त केला आहे. या कार्यक्रमाला खामशेतमधील महिला बचत गटाच्या सदस्या आणि ग्रामस्थ मोठ्या संख्येने उपस्थित होते.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:42 24-03-2026
