संगमेश्वर: रत्नागिरी-कोल्हापूर महामार्गावर दाभोळे बाजारपेठेतील पुलाजवळ एका निष्काळजी डंपर चालकाने पाठीमागे येणाऱ्या दुचाकीला जोरदार धडक दिल्याची घटना घडली आहे. डंपर चालकाने रस्त्याची परिस्थिती न पाहता अचानक वाहन रिव्हर्स घेतल्याने हा अपघात झाला. या भीषण अपघातात दुचाकीचे मोठ्या प्रमाणावर नुकसान झाले असून, दुचाकीस्वार सुदैवाने सुखरूप बचावला आहे.
नक्की काय घडली घटना?
मिळालेल्या माहितीनुसार, फिर्यादी अवधूत हरिश्चंद्र बेलकर (वय ३७, रा. बेलकरवाडी, दाभोळे) हे सोमवार, २३ मार्च २०२६ रोजी पहाटे ३:४५ वाजण्याच्या सुमारास आपल्या ताब्यातील होंडा शाईन दुचाकीने (क्र. MH 08 BA 5167) प्रवास करत होते.
दाभोळे बाजारपेठेतील पुलाच्या अलीकडे आरोपी डंपर चालक बेनी नवल सिंह भुमिया (वय ३२, मूळ रा. जबलपूर, मध्यप्रदेश) याने आपल्या ताब्यातील डंपर (क्र. MH 16 DP 1589) पाठीमागे कोणते वाहन आहे याची कोणतीही खात्री न करता अचानक रिव्हर्स घेतला. यावेळी डंपरची धडक बेलकर यांच्या दुचाकीला बसली. डंपरचे चाक दुचाकीवरून गेल्याने गाडीचा अक्षरशः चक्काचूर झाला आहे.
डंपर चालकाचा निष्काळजीपणा नडला
अपघातावेळी डंपर चालकाने वाहतुकीच्या नियमांकडे दुर्लक्ष केल्याचे समोर आले आहे. रस्त्यावर पाठीमागून येणाऱ्या वाहनाचा अंदाज न घेता रिव्हर्स घेतल्याने हा अपघात घडला. सुदैवाने, धडक बसताच अवधूत बेलकर गाडीवरून बाजूला फेकले गेल्याने त्यांचा जीव वाचला, अन्यथा मोठा अनर्थ ओढवला असता.
संगमेश्वर पोलिसांत गुन्हा दाखल
याप्रकरणी अवधूत बेलकर यांनी संगमेश्वर पोलीस ठाण्यात तक्रार दाखल केली आहे. त्यानुसार, पोलिसांनी रात्री ९:३४ वाजता आरोपी डंपर चालकाविरुद्ध गुन्हा नोंदवला आहे. पोलिसांनी भारतीय न्याय संहिता २०२३ चे कलम २८१ आणि मोटार वाहन कायद्याच्या कलम १८४ अन्वये कारवाई केली असून पुढील तपास सुरू आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
13:24 25-03-2026
