मुंबई: आयपीएल २०२६ (IPL 2026) चा थरार सुरू होण्यासाठी आता अवघे काही दिवस उरले आहेत. सर्व १० फ्रँचायझी संघ मैदानात उतरण्यासाठी सज्ज झाले असतानाच, भारतीय क्रिकेट नियामक मंडळाने (BCCI) खेळाडू आणि संघांसाठी कडक मार्गदर्शक तत्त्वे (Guidelines) जारी केली आहेत. खेळाडूंमधील शिस्त कायम राखण्यासाठी आणि खेळपट्टीची गुणवत्ता टिकवण्यासाठी बीसीसीआयने हे पाऊल उचलले आहे.
सामन्याच्या दिवशी सराव बंद!
‘क्रिकबज’च्या अहवालानुसार, या हंगामातील सर्वात मोठा बदल म्हणजे सामन्याच्या दिवशी सरावावर घालण्यात आलेली बंदी. खेळपट्टी खराब होऊ नये (Pitch Integrity) या उद्देशाने हा निर्णय घेण्यात आला आहे.
- नेट प्रॅक्टिसचे नियम: मुंबईतील वानखेडे स्टेडियमसारख्या ठिकाणी प्रत्येक संघाला सरावासाठी दोन नेट आणि मुख्य स्क्वेअरवर ‘रेंज-हिटिंग’साठी एक साइड विकेट दिली जाईल.
- स्वतंत्र खेळपट्टी: जर दोन संघ एकाच वेळी सराव करत असतील, तर दोघांना स्वतंत्र खेळपट्ट्या दिल्या जातील. प्रतिस्पर्धी संघाची खेळपट्टी रिकामी असली तरी तिचा वापर करण्यास सक्त मनाई असेल.
फिटनेस टेस्ट आणि फॅमिली प्रोटोकॉल
बीसीसीआयने खेळाडूंच्या फिटनेस टेस्ट आणि त्यांच्या कुटुंबीयांच्या उपस्थितीबाबतही काही महत्त्वाचे नियम केले आहेत:
- नो फिटनेस टेस्ट: सामन्याच्या दिवशी मुख्य मैदानावर खेळाडूंची कोणतीही फिटनेस टेस्ट घेता येणार नाही.
- कुटुंबीयांसाठी नियम: सराव सत्रादरम्यान खेळाडूंचे कुटुंबीय किंवा मित्र मैदानावर किंवा ड्रेसिंग रूममध्ये प्रवेश करू शकणार नाहीत. त्यांना केवळ ठरवून दिलेल्या ‘हॉस्पिटॅलिटी एरिया’मधून सराव पाहता येईल.
- प्रवास: सरावासाठी किंवा सामन्यासाठी जाताना खेळाडूंना केवळ ‘टीम बस’नेच प्रवास करणे बंधनकारक आहे. कुटुंबीयांना खेळाडूंसोबत टीम बसमध्ये प्रवास करता येणार नाही.
ड्रेस कोड आणि ब्रॉडकास्टिंग नियम
प्रक्षेपणादरम्यान (Broadcasting) शिस्त दिसण्यासाठी बीसीसीआयने ड्रेस कोडबाबत कडक सूचना दिल्या आहेत:
- ऑरेंज आणि पर्पल कॅप: ज्या खेळाडूंकडे ऑरेंज किंवा पर्पल कॅप असेल, त्यांनी सुरुवातीच्या किमान २ षटकांमध्ये ती कॅप घालणे अनिवार्य आहे, जेणेकरून कॅमेरा त्यांना टिपू शकेल.
- नो स्लीवलेस जर्सी: सामन्यानंतर होणाऱ्या प्रेझेंटेशन सोहळ्यात (Post-match Presentation) खेळाडूंना स्लीवलेस जर्सी किंवा ‘फ्लॉपी हॅट’ घालता येणार नाही. या नियमाचे उल्लंघन केल्यास पहिल्यांदा समज आणि दुसऱ्यांदा आर्थिक दंड ठोठावला जाईल.
- जर्सी नंबर: जर एखाद्या खेळाडूला आपल्या जर्सीचा नंबर बदलायचा असेल, तर त्याची माहिती किमान २४ तास आधी बोर्डाला द्यावी लागेल.
इतर महत्त्वाचे नियम:
- सामन्याच्या दिवशी डॉक्टरसह केवळ १२ सपोर्ट स्टाफ सदस्यांनाच टीमसोबत राहण्याची परवानगी असेल.
- मैदानातील LED बोर्ड्सना इजा पोहोचेल अशा पद्धतीने रेंज-हिटिंग करण्यास मनाई करण्यात आली आहे. तसेच खेळाडू किंवा स्टाफला LED बोर्डसमोर बसता येणार नाही.
बीसीसीआयचा उद्देश: या सर्व नियमांचा मुख्य उद्देश आयपीएलमधील व्यावसायिकता वाढवणे, शिस्त राखणे आणि सर्व संघांना सरावासाठी समान संधी उपलब्ध करून देणे हा आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
17:02 25-03-2026
