बाणकोट (रत्नागिरी): रत्नागिरी जिल्ह्यातील मंडणगड तालुक्यातील कोन्हवली येथे एका सख्ख्या भावानेच दुसऱ्या भावावर बांबूच्या काठीने हल्ला केल्याची खळबळजनक घटना घडली आहे. शासनाकडून मंजूर झालेल्या घरकुलाच्या जागेत दारू पिण्यास विरोध केल्याच्या रागातून हा प्रकार घडला असून, बाणकोट पोलिसांनी आरोपीविरुद्ध विविध कलमान्वये गुन्हा दाखल केला आहे.
नेमकी घटना काय?
मिळालेल्या माहितीनुसार, फिर्यादी दीपक पांडुरंग गमरे (वय ४८, रा. कोन्हवली) यांना ग्रामपंचायत देव्हारे यांच्याकडून ‘घरकुल’ मंजूर झाले आहे. या घरकुलासाठी त्यांनी घराचे जोते (पाया) बांधले आहे. २१ मार्च २०२६ रोजी रात्री १०:३० वाजण्याच्या सुमारास फिर्यादीचा सख्खा भाऊ आरोपी निखिल पांडुरंग गमरे हा या नवीन घराच्या जोत्यावर दारू पीत बसला होता.
फिर्यादी दीपक गमरे यांनी “येथे दारू पिऊ नको, मला नवीन घराचे बांधकाम करायचे आहे,” असे निखिलला सांगितले. याचा राग येऊन आरोपीने “हे जोते कोण बांधत आहे मला माहिती नाही, मी येथेच दारू पिणार, तुला काय करायचे ते करून घे,” असे म्हणत फिर्यादीला शिवीगाळ व धक्काबुक्की केली.
मित्राच्या घरी जाऊन पुन्हा मारहाण
या वादानंतर फिर्यादी दीपक गमरे हे त्यांचे मित्र प्रकाश गजानन तांबे यांच्या घरी जाऊन बसले होते. मात्र, आरोपी निखिल तिथेही पोहोचला. त्याने फिर्यादीला जमिनीवर जोरात ढकलून दिले आणि हातातील बांबूच्या काठीने दीपक यांच्या डाव्या हातावर व पायावर बेदम मारहाण केली. मारहाणीदरम्यान आरोपीने प्रचंड शिवीगाळ करत फिर्यादीला जीवे मारण्याची धमकीही दिली.
बाणकोट पोलिसांत गुन्हा दाखल
या घटनेनंतर दीपक गमरे यांनी बाणकोट पोलीस ठाण्यात तक्रार दाखल केली. पोलिसांनी आरोपी निखिल पांडुरंग गमरे याच्याविरुद्ध गुन्हा रजि. नं. ०९/२०२६ अन्वये गुन्हा नोंदवला आहे. यामध्ये भारतीय न्यायसंहिता (BNS) २०२३ च्या खालील कलमांचा समावेश आहे:
- कलम ११८(१): धोकादायक शस्त्राने (बांबूची काठी) स्वेच्छेने दुखापत करणे.
- कलम ११५(२): स्वेच्छेने दुखापत करणे.
- कलम ३५२: शांतता भंग करण्याच्या उद्देशाने अपमान करणे.
- कलम ३५१(२) व (३): गुन्हेगारी स्वरूपाची धमकी देणे.
जमीन जुमल्याच्या किरकोळ वादातून आणि व्यसनाच्या आहारी गेल्यामुळे सख्ख्या भावामध्ये झालेल्या या भांडणामुळे कोन्हवली गावात चर्चेला उधाण आले आहे. पोलीस या प्रकरणाचा अधिक तपास करत आहेत.
