गुहागर: कोकणच्या शैक्षणिक दर्जात आणखी एक मोठी भर पडली आहे. गुहागर तालुक्यातील वेळणेश्वर येथील ‘पीएमश्री’ (PM SHRI) स्कूल (जि.प. आदर्श शाळा वेळणेश्वर नं. १) या प्रशालेला ध्येय एज्युकेशन फाउंडेशनचा अत्यंत मानाचा समजला जाणारा ‘राज्यस्तरीय आदर्श शाळा पुरस्कार’ जाहीर झाला आहे. शाळेने राबवलेल्या विविध नाविन्यपूर्ण शैक्षणिक उपक्रमांची दखल घेऊन या पुरस्कारासाठी निवड करण्यात आली आहे.
शिक्षणमंत्र्यांच्या हस्ते पुण्यात होणार गौरव
राज्याचे शिक्षणमंत्री ना. दादा भुसे यांच्या हस्ते या पुरस्काराचे वितरण होणार आहे. हा दिमाखदार सोहळा निगडी-पुणे येथील ग. दि. माडगुळकर नाट्यगृहात आयोजित करण्यात आला आहे.
सोहळ्याला उपस्थित राहणारे मान्यवर: या पुरस्कार वितरण सोहळ्याला आमदार राहुल दादा कुल, आमदार उमाताई खापरे, आमदार अमित घोडके, आमदार अरुण लाड, पुणे जिल्हा परिषदेचे अध्यक्ष वीरधवल जगदाळे आदी मान्यवर उपस्थित राहणार आहेत.
शैक्षणिक गुणवत्तेची दखल
वेळणेश्वर येथील या शाळेने केवळ पुस्तकी शिक्षणच नव्हे, तर विद्यार्थ्यांच्या सर्वांगीण विकासासाठी अनेक शैक्षणिक उपक्रम राबवले आहेत. शाळेची शिस्त, गुणवत्तापूर्ण अध्यापन आणि आदर्श व्यवस्थापन यामुळे या शाळेचा राज्यात डंका वाजला आहे. ‘पीएमश्री’ योजनेअंतर्गत शाळेने आधुनिक शिक्षणाची कास धरल्याने या पुरस्कारासाठी त्यांची वर्णी लागली आहे.
प्रशासक आणि शिक्षकांचे यश
या मोठ्या यशाबद्दल वेळणेश्वर शाळेच्या संपूर्ण टीमचे अभिनंदन होत आहे. यामध्ये प्रामुख्याने:
- मुख्याध्यापक: सतीश नलावडे
- शिक्षक: शैलजा साळे, बिपीन विचारे, बाबासाहेब राशिनकर, सुलक्षणा करडे-राशिनकर, भारती गोवेकर.
- शिक्षणसेविका: प्रियंका पवार, अंजुम शेख, तेजस्विनी जगताप.
- शाळा व्यवस्थापन समिती: अध्यक्ष संदीप गावंग आणि उपाध्यक्ष वैभव ठाकूर.
या सर्व शिक्षक वृंद आणि व्यवस्थापन समितीच्या मेहनतीमुळेच शाळेने हे यश संपादन केले आहे, अशा भावना व्यक्त केल्या जात आहेत.
गुहागर तालुक्यात उत्साहाचे वातावरण
ग्रामीण भागातील एका शाळेने राज्यस्तरावर आपली ओळख निर्माण केल्यामुळे संपूर्ण गुहागर तालुक्यातून कौतुकाचा वर्षाव होत आहे. या पुरस्कारामुळे शाळेतील विद्यार्थ्यांमध्येही उत्साहाचे वातावरण असून, शाळेच्या प्रगतीचा हा आलेख यापुढेही असाच चढता राहील, असा विश्वास व्यक्त केला जात आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
15:08 31-03-2026
