रत्नागिरी/सावंतवाडी: सावंतवाडी शहरात एका अल्पवयीन मुलीला फूस लावून पळवून नेण्याचा खळबळजनक प्रकार समोर आला आहे. मात्र, सावंतवाडी पोलिसांनी अत्यंत सतर्कता दाखवत रेल्वे पोलिसांच्या मदतीने रत्नागिरी रेल्वे स्थानकावर मध्यरात्री सापळा रचून या मुलीची सुटका केली. या प्रकरणी पोलिसांनी दोन तरुणांना अटक केली असून एक अल्पवयीन संशयित पोलिसांच्या ताब्यात आहे.
नेमकी घटना काय?
संबंधित अल्पवयीन मुलगी शिक्षणासाठी मुंबईत असताना तिची ओळख एका तरुणाशी झाली होती. त्यांच्यातील वाढत्या मैत्रीला मुलीच्या पालकांनी विरोध केला होता आणि खबरदारी म्हणून तिला पुन्हा सावंतवाडीत आणले होते. मात्र, हा तरुण आपल्या दोन मित्रांसह तिला पुन्हा मुंबईला नेण्यासाठी सावंतवाडीत पोहोचला.
सुरुवातीला पोलिसांनी हस्तक्षेप करून मुलीला ताब्यात घेऊन पालकांच्या स्वाधीन केले होते. पण, जिद्द न सोडता मुलीने पुन्हा घरातून पळ काढला आणि या तरुणांसोबत मुंबईच्या दिशेने रेल्वेने रवाना झाली.
मध्यरात्री १२:३० वाजता रेल्वे स्थानकावर थरार
मुलगी घरातून बेपत्ता झाल्याचे समजताच पालकांनी तातडीने सावंतवाडी पोलीस ठाणे गाठले. प्रकरणाचे गांभीर्य लक्षात घेऊन पोलिसांनी तांत्रिक तपासाच्या आधारे संशयित रेल्वेने प्रवास करत असल्याचे शोधून काढले. तात्काळ रत्नागिरी रेल्वे पोलिसांशी संपर्क साधण्यात आला. मध्यरात्री १२:३० च्या सुमारास रत्नागिरी स्थानकावर पोलिसांनी धाडसी कारवाई करत संबंधित मुलगी आणि तिन्ही तरुणांना रेल्वेतून ताब्यात घेतले.
आरोपींवर गुन्हा दाखल
या प्रकरणात पोलिसांनी खालील संशयितांविरुद्ध कारवाई केली आहे:
- साई बसवेश्वर रिंजे (वय १८) – अटक
- रोन मोहन राठोड (वय १८) – अटक
- तिसरा संशयित – अल्पवयीन (कायदेशीर प्रक्रिया सुरू)
या संशयितांविरुद्ध अपहरणाचा प्रयत्न आणि इतर संबंधित कलमान्वये गुन्हे दाखल करण्यात आले आहेत. या सर्वांना चौकशीसाठी सावंतवाडीत आणण्यात आले आहे.
पोलिसांचा अधिक तपास सुरू
मुलीला पळवून नेण्याच्या या कटात आणखी कोणाचा सहभाग आहे का? तसेच यामागे काही मोठे रॅकेट आहे का? याचा सखोल तपास सध्या सावंतवाडी पोलीस करत आहेत. पोलिसांच्या या तत्परतेमुळे एका अल्पवयीन मुलीचा जीव धोक्यातून वाचल्याने पालकांनी सुटकेचा नि:श्वास सोडला आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:53 01-04-2026
