रत्नागिरी: रत्नागिरी शहराला स्वच्छ आणि सुंदर बनवण्यासोबतच ‘प्लास्टिकमुक्त’ करण्यासाठी रत्नागिरी नगर परिषदेने आता आक्रमक पाऊल उचलले आहे. प्रशासनाने प्लास्टिक विरोधात पुन्हा एकदा कंबर कसली असून, आज शहराच्या मुख्य केंद्रबिंदू असलेल्या मारुती मंदिर परिसरात धडाकेबाज मोहीम राबवण्यात आली. या मोहिमेमुळे नियम धाब्यावर बसवणाऱ्या दुकानदारांचे धाबे दणाणले आहेत.
मारुती मंदिर परिसरात धडक कारवाई
गेल्या काही दिवसांपासून शहरात प्रतिबंधित प्लास्टिकचा वापर वाढल्याच्या तक्रारी प्राप्त होत होत्या. या पार्श्वभूमीवर रत्नागिरी नगर परिषदेच्या पथकाने आज सकाळी मारुती मंदिर परिसरातील विविध दुकानांची अचानक तपासणी केली. या तपासणी दरम्यान ज्या दुकानदारांकडे प्रतिबंधित प्लास्टिक पिशव्यांचा साठा आढळला, तो सर्व साठा प्रशासनाने तात्काळ जप्त केला आहे.
व्यापाऱ्यांना प्रशासनाचे कडक आवाहन
केवळ कारवाई करून न थांबता, नगर परिषदेच्या अधिकार्यांनी सर्व व्यापाऱ्यांना आणि दुकानदारांना प्रत्यक्ष भेटून प्लास्टिकचा वापर टाळण्याचे आवाहन केले. “प्लास्टिक हे पर्यावरणासाठी घातक असून, शहराच्या सांडपाणी व्यवस्थेतही अडथळे निर्माण करते. त्यामुळे पर्यावरणाचे रक्षण करण्यासाठी कापडी किंवा कागदी पिशव्यांचा वापर करावा,” असे आवाहन यावेळी करण्यात आले.
आता थेट दंडात्मक कारवाईची तयारी
आजची मोहीम ही एक प्रकारे इशारा असून, यापुढेही जर कोणी प्रतिबंधित प्लास्टिक पिशव्यांचा वापर किंवा विक्री करताना आढळले, तर त्यांच्यावर कोणतीही दयामाया न दाखवता थेट दंडात्मक कारवाई केली जाणार असल्याचे प्रशासनाने स्पष्ट केले आहे. नगर परिषदेने यासाठी विशेष पथके तैनात केली असून शहराच्या इतर भागांतही ही मोहीम तीव्र करण्यात येणार आहे.
रत्नागिरीकरांना सहकार्याचे आवाहन
“रत्नागिरी शहराला प्लास्टिकमुक्त करणे ही केवळ प्रशासनाची जबाबदारी नसून, यात नागरिकांचा सहभाग अत्यंत महत्त्वाचा आहे. ग्राहकांनी घरातून निघताना सोबत कापडी पिशवी बाळगावी आणि दुकानदारांकडे प्लास्टिकची मागणी करू नये,” असे आवाहन नगर परिषद प्रशासनामार्फत करण्यात आले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:11 01-04-2026
