रत्नागिरी: कडाक्याच्या उन्हात रत्नागिरीकरांसाठी सुखावणारी बातमी समोर आली आहे. वाढत्या तापमानामुळे पाणीटंचाईची भीती व्यक्त केली जात असतानाच, रत्नागिरी नगरपरिषदेने शहराला दररोज आणि पुरेसा पाणीपुरवठा होणार असल्याचे जाहीर केले आहे. शीळ धरणात पुढील दोन महिने पुरेल इतका मुबलक साठा उपलब्ध असून, एप्रिल आणि मे या दोन्ही महिन्यांत रत्नागिरीकरांना पाणीकपातीचा सामना करावा लागणार नाही.
शीळ धरणात १.६७९ दशलक्ष घनमीटर पाणीसाठा
या संदर्भात आयोजित पत्रकार परिषदेत नगराध्यक्षा शिल्पा सुर्वे, मुख्याधिकारी वैभव गारवे आणि पाणी सभापती निमेष नायर यांनी महत्त्वाची माहिती दिली. पाणी सभापती निमेष नायर यांनी बुधवारी, १ एप्रिल २०२६ रोजी प्रत्यक्ष शीळ धरणाची पाहणी केली. या पाहणीनुसार, धरणात सध्या १.६७९ दशलक्ष घनमीटर इतका पाणीसाठा शिल्लक आहे.
पुढील ८० दिवसांचे नियोजन पूर्ण
रत्नागिरी शहराला दररोज साधारणपणे २० MLD (दशलक्ष लिटर) पाण्याची गरज भासते. धरणातील सध्याचा साठा पाहता, शहराला पुढील ८० दिवस म्हणजेच जूनच्या मध्यापर्यंत पुरेल इतके पाणी उपलब्ध आहे. बाष्पीभवनामुळे पाणी साठ्यात काही प्रमाणात घट होण्याची शक्यता गृहीत धरूनही, एप्रिल आणि मे या दोन महिन्यांत दररोज पाणीपुरवठा करणे प्रशासनाला शक्य होणार आहे.
नळपाणी योजनेमुळे दाबाने पाणीपुरवठा
शहरातील नळपाणी योजना पूर्ण होऊन आता दोन वर्षे झाली आहेत. यामुळे शहराच्या सर्व भागांत पुरेसा आणि योग्य दाबाने पाणीपुरवठा होत आहे. पाणी सभापतींनी सांगितले की, पाइपलाईन फुटी किंवा किरकोळ दुरुस्तीची कामे तातडीने पूर्ण करण्यासाठी विशेष पथके तैनात करण्यात आली आहेत, जेणेकरून तांत्रिक कारणांमुळे पाणीपुरवठा विस्कळीत होणार नाही.
महिनाभरानंतर पुन्हा आढावा घेणार
सध्या जरी पाणीसाठा पुरेसा असला, तरीही वाढते बाष्पीभवन आणि पाण्याचा वापर लक्षात घेऊन प्रशासन सतर्क आहे. “आजच्या साठ्यानुसार मे महिन्यापर्यंत कोणतीही अडचण नाही. तरीही, एका महिन्यानंतर म्हणजेच मे महिन्याच्या सुरुवातीला पुन्हा एकदा पाणीसाठ्याचा सविस्तर आढावा घेतला जाईल,” अशी माहिती यावेळी देण्यात आली.
नागरिकांना आवाहन
प्रशासनाने रत्नागिरीकरांना दिलासा दिला असला, तरी उन्हाळ्याचे गांभीर्य ओळखून नागरिकांनी पाण्याचा अपव्यय टाळावा आणि पाण्याचा वापर जपून करावा, असे आवाहनही नगराध्यक्षा शिल्पा सुर्वे यांनी केले आहे.
