संगमेश्वर (कळंबस्ते): तालुक्यातील कळंबस्ते-भिमनगर परिसरात एका खासगी फळबागेला अज्ञात इसमाने जाणीवपूर्वक आग लावल्याची धक्कादायक घटना उघडकीस आली आहे. या भीषण आगीत मौल्यवान रक्तचंदनाची झाडे, आंबा आणि काजूच्या कलमांसह सुमारे ३४० हून अधिक झाडे जळून खाक झाली असून, संबंधित शेतकऱ्याचे लाखो रुपयांचे आर्थिक नुकसान झाले आहे.
नेमकी घटना काय?
मिळालेल्या माहितीनुसार, फिर्यादी संकेत सिद्धार्थ मोहिते (३९), जे सध्या मुंबई येथे राज्य उत्पादन शुल्क विभागात कार्यरत आहेत, यांची कळंबस्ते-भिमनगर येथे वडिलोपार्जित सामाईक मालकीची बाग आहे. २९ मार्च रोजी दुपारी १:३० च्या सुमारास सर्व्हे नं. २०/१९ आणि २०/२१ मधील या बागेला अचानक आग लागली. ही आग नैसर्गिक नसून कोणीतरी अज्ञात इसमाने जाणीवपूर्वक लावल्याचा संशय फिर्यादी यांनी व्यक्त केला आहे.
आगीच्या भक्ष्यस्थानी पडलेली झाडे:
या आगीमुळे निसर्गाचे आणि शेतकऱ्याचे अपरिमित नुकसान झाले आहे. जळालेल्या झाडांचा तपशील खालीलप्रमाणे आहे:
- मौल्यवान झाडे: रक्तचंदन आणि श्वेत चंदनाची सुमारे १५० झाडे.
- फळबागा: वेगवेगळ्या जातीची १४० आंब्याची झाडे.
- इतर झाडे: शेवगा, काळीमिरी, आवळा, फणस, काजू, पेरू, रातांबी (कोकम) आणि चिकूची सुमारे ५० झाडे.
पोलिसांत गुन्हा दाखल
बागेचे प्रचंड नुकसान झाल्याचे लक्षात आल्यानंतर संकेत मोहिते यांनी तातडीने संगमेश्वर पोलीस ठाण्यात धाव घेतली. ३१ मार्च रोजी रात्री याप्रकरणी रीतसर तक्रार दाखल करण्यात आली. पोलिसांनी अज्ञात इसमाविरुद्ध भारतीय न्याय संहिता २०२३ च्या कलम ३२६ (फ) अन्वये गुन्हा दाखल केला आहे.
बागायतदारांमध्ये चिंतेचे वातावरण
कोकणात सध्या कडक उन्हाळा आणि उष्णतेची लाट असतानाच, अशा प्रकारे बागांना जाणीवपूर्वक आग लावण्याच्या (वणवा) घटनांमुळे स्थानिक बागायतदारांमध्ये भीती आणि चिंतेचे वातावरण पसरले आहे. रक्ताचे पाणी करून वाढवलेली झाडे क्षणात खाक झाल्याने शेतकऱ्याचे कंबरडे मोडले आहे.
तपासाची दिशा: संगमेश्वर पोलीस या प्रकरणाचा अधिक तपास करत असून, ही आग वैयक्तिक वैमनस्यातून लावली गेली की अन्य काही कारण आहे, याचा शोध घेत आहेत. संशयित आरोपीला लवकरच अटक करण्याची मागणी ग्रामस्थांनी केली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:16 02-04-2026
