देवरुख (रत्नागिरी): संगमेश्वर तालुक्यातील ताम्हाने परिसरात एका अज्ञात माथेफिरूने पुन्हा एकदा डोके वर काढले आहे. ताम्हाने हायस्कूलच्या दोन मुलींना रस्त्यात अडवून त्यांच्यासोबत अश्लील चाळे केल्याचा धक्कादायक प्रकार समोर आला आहे. या घटनेमुळे परिसरात भीतीचे वातावरण असून पालकांनी या विकृत व्यक्तीचा तात्काळ बंदोबस्त करण्याची मागणी केली आहे.
नेमकी घटना काय?
मिळालेल्या माहितीनुसार, बुधवारी ताम्हाने हायस्कूलच्या दोन मुली शाळेकडे जात असताना एका दुचाकीस्वाराने त्यांना रस्त्यात थांबवले. या माथेफिरूने मुलींसमोर अत्यंत अश्लील चाळे केले. या अनपेक्षित प्रकारामुळे मुली प्रचंड घाबरल्या आणि त्यांनी आरडाओरडा करत तिथून पळ काढला. घरी पोहोचल्यानंतर त्यांनी ही गंभीर बाब आपल्या पालकांना सांगितली.
दोन महिन्यांनंतर पुन्हा तीच घटना
विशेष म्हणजे, अशाच प्रकारची घटना दोन-तीन महिन्यांपूर्वीही याच परिसरात घडली होती. त्यावेळीही एका माथेफिरूने हायस्कूलच्या मुलींची छेड काढण्याचा प्रयत्न केला होता. त्यावेळेस देवरुख पोलिसांत तक्रार दाखल करण्यात आली होती, मात्र पोलिसांना त्या माथेफिरूचा पत्ता लागला नव्हता. आता पुन्हा त्याच पद्धतीने मुलींना लक्ष्य केल्याने हा तोच माथेफिरू असावा, असा संशय व्यक्त केला जात आहे.
पोलीस तपासाला वेग
घटनेचे गांभीर्य ओळखून पालकांनी शाळेचे मुख्याध्यापक चोरमाले यांची भेट घेतली आणि त्यांना सर्व प्रकार सांगितला. त्यानंतर देवरुख पोलीस ठाण्यात या प्रकरणाची रीतसर तक्रार नोंदवण्यात आली आहे.
- पोलीस निरीक्षक उदय झावरे यांनी प्रकरणाची दखल घेऊन तातडीने तपास सुरू केला आहे.
- परिसरातील सीसीटीव्ही फुटेज आणि संशयित दुचाकीस्वारांची माहिती गोळा केली जात आहे.
नागरिकांना आवाहन
देवरुख पोलिसांनी नागरिकांना आवाहन केले आहे की, जर कोणाला या विकृत व्यक्तीबद्दल किंवा संशयास्पद दुचाकीस्वाराबद्दल काहीही माहिती मिळाल्यास त्यांनी तातडीने पोलिसांशी संपर्क साधावा. मुलींच्या सुरक्षेसाठी पोलिसांनी या भागात गस्त वाढवावी, अशी मागणी ग्रामस्थांकडून होत आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:48 03-04-2026
