देवरुख (रत्नागिरी): रत्नागिरी-कोल्हापूर मार्गावरील आंबा घाटात प्रवाशांना अडवून, मारहाण करत चाकूच्या धाकाने लुटणाऱ्या टोळीचा देवरुख पोलिसांनी पर्दाफाश केला आहे. या दरोड्याच्या गुन्ह्यातील ८ आरोपींपैकी ५ जणांना पोलिसांनी तातडीने बेड्या ठोकल्या असून, रत्नागिरी पोलीस दलाच्या या उत्कृष्ट कामगिरीचे सर्वत्र कौतुक होत आहे.
नेमकी घटना काय?
कोल्हापूर जिल्ह्यातील शाहूवाडी येथील फिर्यादी प्रथमेश तानाजी दळवी हे ८ एप्रिल २०२६ रोजी संध्याकाळी ६:३० च्या सुमारास आपल्या बोलेरो गाडीतून वेतोशी (रत्नागिरी) येथून एक म्हैस भरून सांगलीकडे जात होते. आंबा घाटातील दख्खन परिसरात आले असता, दोन गाड्यांनी (पांडुरंग लिहिलेली थार आणि ‘भारत सरकार’ स्टिकर असलेली इनोव्हा) त्यांचा रस्ता अडवला.
गाड्यांमधून उतरलेल्या ८ अज्ञातांनी प्रथमेश यांना गाडीतून ओढून बाहेर काढले, जबर मारहाण केली आणि चाकूचा धाक दाखवून त्यांचे अपहरण केले. त्यांना जबरदस्तीने इनोव्हा गाडीत कोंबून साखरपा येथील गंद्रे पेट्रोल पंपावर नेण्यात आले. तिथे त्यांना ५० हजार रुपयांची मागणी करत जीवे मारण्याची धमकी दिली आणि गाडीतील २५,००० रुपये जबरदस्तीने काढून घेतले.
पोलिसांची वेगवान तपासाचक्रं
या गंभीर घटनेची तक्रार ९ एप्रिल रोजी देवरुख पोलीस ठाण्यात दाखल होताच, पोलिसांनी भारतीय न्याय संहिता (BNS) २०२३ च्या विविध कलमान्वये (३०९(४), ३१०(१), २०४ इ.) गुन्हा दाखल केला. रत्नागिरीचे पोलीस अधीक्षक श्री. नितीन बगाटे आणि अपर पोलीस अधीक्षक श्री. बी. बी. महामुनी यांनी प्रकरणाचे गांभीर्य ओळखून तात्काळ तपास पथके तयार करण्याचे आदेश दिले.
पोलीस निरीक्षक उदय झावरे यांच्या नेतृत्वाखालील पथकाने तांत्रिक विश्लेषण आणि गोपनीय माहितीच्या आधारे अवघ्या काही तासांत ५ आरोपींना शोधून काढले.
अटक करण्यात आलेले आरोपी:
१. फरहान रशिद मुल्ला (वय ४२, रा. कोकण नगर, रत्नागिरी) २. प्रथमेश सचिन भाटकर (वय २४, रा. गोळप, रत्नागिरी) ३. सर्वेश सुभाष किर (वय २२, रा. सोमेश्वर किरबाग, रत्नागिरी) ४. धर्मलिंगम विजयकुमार नाडर (वय २६, रा. कुवारबांव, रत्नागिरी) ५. भुषण बिपेंद्र सावंत (वय २६, रा. मिऱ्या, रत्नागिरी)
या पाचही आरोपींना पोलिसांनी अटक केली असून, गुन्ह्यात वापरलेली वाहने आणि उर्वरित ३ फरार आरोपींचा शोध सध्या युद्धपातळीवर सुरू आहे.
तपास पथकाची उत्कृष्ट कामगिरी
ही यशस्वी कामगिरी पोलीस अधीक्षक नितीन बगाटे, अपर पोलीस अधीक्षक बी. बी. महामुनी आणि उपविभागीय पोलीस अधिकारी (लांजा) सुरेश कदम यांच्या मार्गदर्शनाखाली खालील पथकाने केली:
- उदय झावरे (पोलीस निरीक्षक, देवरुख)
- पोलीस उपनिरीक्षक प्रमोद वाघाटे
- शांताराम पंदेरे, प्रशांत मसुरकर, सचिन कामेरकर, नितीन जाधव (पोलीस अंमलदार)
- प्रशांत साळुंखे, अमर सुतार आणि महिला पोलीस कॉन्स्टेबल रेश्मा चव्हाण.
महत्त्वाची टीप: आंबा घाट परिसरातून प्रवास करणाऱ्या चालकांनी सतर्क राहावे आणि कोणत्याही संशयास्पद हालचाली आढळल्यास तात्काळ नजीकच्या पोलीस स्टेशनशी संपर्क साधावा, असे आवाहन पोलीस प्रशासनाकडून करण्यात आले आहे.
