२४ सप्टेंबरला प्रक्रियेचा मार्ग मोकळा
रत्नागिरी:
रत्नागिरी जिल्हा परिषद शिक्षक समुपदेशन प्रक्रियेला दोन दिवसांची स्थगिती देण्यात आली असून, आता हे समुपदेशन २२ सप्टेंबरऐवजी २४ सप्टेंबर रोजी पार पडणार आहे. रत्नागिरी जिल्हा परिषदेच्या प्राथमिक शिक्षण विभागामार्फत पवित्र पोर्टलद्वारे निवड झालेल्या ४५७ उमेदवारांसाठी ही प्रक्रिया राबवली जात आहे. जिल्ह्यातील ज्येष्ठ पदवीधर शिक्षकांचे त्यांच्या सोयीच्या ठिकाणी समायोजन केल्यानंतरच नव्याने येणाऱ्या उमेदवारांचे समुपदेशन घेण्यात यावे, असे स्पष्ट निर्देश रत्नागिरी जिल्ह्याचे पालकमंत्री उदय सामंत यांनी जिल्हा प्रशासनाला दिले आहेत.
कागदपत्र पडताळणीनंतर समुपदेशनाचे नियोजन
रत्नागिरी जिल्ह्यात प्राथमिक शिक्षकांची १ हजारांहून अधिक पदे रिक्त होती. या पार्श्वभूमीवर पवित्र प्रणालीद्वारे ४७८ उमेदवारांची निवड करण्यात आली होती. शिक्षण विभागाकडून सलग तीन दिवस सर्व उमेदवारांच्या कागदपत्रांची सखोल तपासणी पूर्ण करण्यात आली. या पडताळणी प्रक्रियेला २१ उमेदवारांनी अनुपस्थिती दर्शवली होती, तर ४५७ उमेदवार पात्र ठरले होते. कागदपत्रांची पडताळणी पूर्ण होऊनही समुपदेशनाची प्रक्रिया लांबणीवर पडल्याने पात्र उमेदवार आणि त्यांच्या पालकांमध्ये चिंतेचे वातावरण निर्माण झाले होते. अखेर २२ सप्टेंबर ही तारीख समुपदेशनासाठी निश्चित करण्यात आली होती आणि शिक्षण विभागाने त्यादृष्टीने सर्व तयारी पूर्ण केली होती.
शिक्षक संघटनांची मागणी अन् पालकमंत्र्यांचा हस्तक्षेप
समुपदेशनाची प्रक्रिया सुरू होण्यापूर्वीच स्थानिक शिक्षक संघटनांनी पालकमंत्री उदय सामंत यांची भेट घेऊन पदवीधर शिक्षकांच्या अडचणी मांडल्या. जिल्ह्यातील अनेक ज्येष्ठ पदवीधर शिक्षकांना मूळ रहिवासापासून ४५ किलोमीटरपेक्षा जास्त अंतरावरील शाळा मिळाल्या आहेत. त्यामुळे नवीन उमेदवारांना शाळांचे पर्याय देण्यापूर्वी या ज्येष्ठ पदवीधर शिक्षकांचे त्यांच्या सोयीच्या जागी समायोजन करण्यात यावे, अशी आग्रही मागणी संघटनांनी केली. या मागणीची दखल घेत पालकमंत्र्यांनी समुपदेशन प्रक्रिया दोन दिवस पुढे ढकलण्याच्या सूचना प्रशासनाला दिल्या.
उच्चस्तरीय आढावा बैठकीत निर्णय
रत्नागिरी जिल्ह्याच्या दौऱ्यावर असताना पालकमंत्री उदय सामंत यांनी प्राथमिक शिक्षण विभागाची विशेष आढावा बैठक घेतली. या बैठकीत त्यांनी पदवीधर शिक्षकांच्या समस्या सविस्तर समजून घेतल्या. जिल्ह्यातील ज्येष्ठ पदवीधर शिक्षकांना दिलासा देण्यासाठी प्रथम त्यांचे समायोजन करण्याचे आदेश त्यांनी दिले.
या महत्त्वपूर्ण बैठकीला जिल्हा परिषदेच्या मुख्य कार्यकारी अधिकारी (सीईओ) वैदेही रानडे, जिल्हा परिषदेचे उपाध्यक्ष विलास चाळके, शिक्षण सभापती नंदकुमार मुरकर आणि प्राथमिक शिक्षणाधिकारी मनीषा जगदाळे यांच्यासह शिक्षण विभागातील प्रमुख अधिकारी उपस्थित होते. पालकमंत्र्यांच्या या निर्देशानंतर आता २४ सप्टेंबर रोजी सुधारित वेळेनुसार ४५७ उमेदवारांचे समुपदेशन पार पडेल, असे शिक्षण विभागाच्या वतीने स्पष्ट करण्यात आले आहे.
