१ ऑक्टोबर ते ३१ डिसेंबर २०२६ या कालावधीत १५ विविध श्रेणींमधील खटल्यांवर मध्यस्थी; प्रमुख जिल्हा न्यायाधीशांचे आवाहन
Mediation For Nation 3.0 Ratnagiri संदर्भात रत्नागिरी जिल्ह्यातील न्यायालयांमधून एक अत्यंत महत्त्वाची बातमी समोर येत आहे. अखिल भारतीय पातळीवर राबवली जाणारी ‘मेडिएशन फॉर नेशन ३.०’ (Mediation For Nation 3.0) ही विशेष मोहीम येत्या १ ऑक्टोबर २०२६ पासून रत्नागिरी जिल्ह्यातील सर्व न्यायालयांमध्ये सुरू होत आहे.
जिल्हा विधी सेवा प्राधिकरणाचे सचिव आर. आर. पाटील यांनी दिलेल्या माहितीनुसार, १ ऑक्टोबर २०२६ ते ३१ डिसेंबर २०२६ या तीन महिन्यांच्या कालावधीत न्यायालयातील प्रलंबित दावे, विविध वाद आणि तडजोडपात्र फौजदारी खटले मध्यस्थीद्वारे परस्पर सामंजस्याने निकाली काढले जाणार आहेत.
यापूर्वी राबवण्यात आलेल्या ‘मेडिएशन फॉर नेशन’च्या पहिल्या अभियानात (१ जुलै ते ३० सप्टेंबर २०२५) पाठवलेल्या १,८३४ प्रकरणांपैकी ९१ प्रकरणे सामंजस्याने मिटवण्यात आली होती. त्यानंतर दुसऱ्या अभियानात (२ जानेवारी ते ३१ मार्च २०२६) ८२२ पैकी ५४ प्रकरणांमध्ये यशस्वी तडजोड झाली होती.
‘मेडिएशन फॉर नेशन ३.०’ मधील प्रमुख १५ श्रेणी:
या मोहिमेअंतर्गत वैवाहिक वाद, कौटुंबिक हिंसाचार, मोटार अपघात नुकसानभरपाई, चेक बाऊन्स (धनादेश अनादर), तडजोडपात्र फौजदारी खटले, ग्राहक तक्रार मंच, बँक कर्ज वसुली व दरखास्त, लवाद आणि वाणिज्य (कमर्शियल) प्रकरणे, सेवाविषयक वाद, वाटप, बेदखलपात्र, भूसंपादन, कामगार न्यायालय व इतर दिवाणी दाव्यांचे कामकाज मध्यस्थी केंद्रात चालवले जाईल.
पक्षकारांनी आपले वाद न्यायालयात प्रदीर्घ काळ न ताणता परस्पर सामंजस्याने आणि जलद गतीने सोडवण्यासाठी या विशेष मोहिमेचा जास्तीत जास्त लाभ घ्यावा, असे आवाहन जिल्हा विधी सेवा प्राधिकरणाचे अध्यक्ष तथा प्रमुख जिल्हा व सत्र न्यायाधीश विनोद जाधव यांनी केले आहे.
