स्थानिक गुन्हे अन्वेषण शाखेची धडक कारवाई; मोबाईलसह १ लाख ११ हजार रुपयांचा मुद्देमाल हस्तगत
Ratnagiri Brown Heroin Seized News संदर्भात रत्नागिरी शहरातून अमली पदार्थविरोधी कारवाईची मोठी बातमी समोर आली आहे. शहरातील मच्छीमार्केट परिसरातील चर्चसमोर कारवाई करत रत्नागिरी शहर पोलिसांनी ७ ग्रॅम ब्राऊन हेरॉईन (टरकी) जप्त करून दोघा संशयितांना अटक केली आहे. ही कारवाई २१ सप्टेंबर रोजी दुपारी १:३५ वाजण्याच्या सुमारास करण्यात आली.
जप्त करण्यात आलेल्या अमली पदार्थाची किंमत ९१ हजार रुपये असून, मोबाईलसह एकूण १ लाख ११ हजार रुपयांचा मुद्देमाल पोलिसांनी हस्तगत केला आहे. नूरमोहम्मद दिलमोहम्मद खान उर्फ कल्लू (वय २५, रा. भाजी मार्केटसमोर) आणि मस्तान शेख (वय २६, रा. अजगावकरवाडी, बाजारपेठ, रत्नागिरी) अशी अटक करण्यात आलेल्या संशयितांची नावे आहेत.
स्थानिक गुन्हे अन्वेषण शाखेचे अधिकारी व अंमलदार सोमवारी दुपारी रत्नागिरी शहर पोलिस ठाणे परिसरात गस्त घालत असताना, मच्छीमार्केट येथील चर्चसमोरील रस्त्यावर दोन संशयित पोलिसांना आढळून आले. संशय आल्याने पोलिसांनी त्यांची चौकशी करून अंगझडती घेतली. या वेळी त्यांच्याकडील पिशवीत ब्राऊन हेरॉईनच्या १८२ पुड्या आढळून आल्या. ७ ग्रॅम वजनाच्या या अमली पदार्थांची बाजारातील किंमत ९१ हजार रुपये आहे. याशिवाय त्यांच्याकडून २० हजार रुपये किमतीचा मोबाईल असा एकूण १ लाख ११ हजार रुपयांचा मुद्देमाल जप्त करण्यात आला आहे.
