सण-उत्सव, स्थानिक आंदोलने व कायदा-सुव्यवस्थेच्या पार्श्वभूमीवर कारवाई; मोर्चा किंवा सभेसाठी पूर्वपरवानगी बंधनकारक
Ratnagiri Prohibitory Orders October 3 संदर्भात रत्नागिरी जिल्ह्यातून एक महत्त्वाची प्रशासकीय बातमी समोर आली आहे. आगामी काळातील विविध सण-उत्सव, स्थानिक आंदोलने आणि कायदा व सुव्यवस्थेची परिस्थिती लक्षात घेऊन संपूर्ण जिल्ह्यात प्रतिबंधात्मक आदेश जारी करण्यात आले आहेत. जिल्हा दंडाधिकाऱ्यांच्या मान्यतेने अप्पर जिल्हा दंडाधिकारी चंद्रकांत सूर्यवंशी यांनी महाराष्ट्र पोलीस अधिनियम १९५१ चे कलम ३७ (१) (३) अन्वये हे आदेश लागू केले आहेत. हे आदेश १९ सप्टेंबर रोजी रात्री १२ वाजेपासून ३ ऑक्टोबर रोजी रात्री १२ वाजेपर्यंत संपूर्ण रत्नागिरी जिल्ह्यात अंमलात राहतील.
येत्या काळात अनंत चतुर्दशी, अंगारक संकष्ट चतुर्थी आणि महात्मा गांधी जयंती यांसारखे महत्त्वाचे सण-उत्सव साजरे होणार आहेत. तसेच खेड येथील कोकाकोला कंपनी, अलोरे-शिरगाव येथील साफईस्ट कंपनी, वाटदखंडाळा येथील प्रस्तावित एमआयडीसी प्रकल्प आणि मुंबई-गोवा महामार्गाच्या अपूर्ण कामाच्या निषेधार्थ विविध संघटनांकडून आंदोलने केली जात आहेत. या सर्व बाबींच्या पार्श्वभूमीवर जिल्ह्यातील शांतता व सुव्यवस्था अबाधित राहावी यासाठी हे प्रतिबंधात्मक पाऊल उचलण्यात आले आहे.
या कालावधीत कोणताही मोर्चा, मिरवणूक अथवा सभा आयोजित करावयाची असल्यास संबंधित उपविभागीय दंडाधिकाऱ्यांची पूर्व लेखी परवानगी घेणे अत्यंत बंधनकारक राहील. दरम्यान, अंत्ययात्रा, धार्मिक विधी, विवाह सोहळे, सामाजिक सण, शासकीय कार्यक्रम, शासकीय सेवेत तैनात कर्मचारी आणि सार्वजनिक करमणुकीची सिनेमागृहे व नाट्यगृहे यांना या प्रतिबंधात्मक आदेशातून सूट देण्यात आल्याचे प्रसिद्धीपत्रकात स्पष्ट करण्यात आले आहे
