नूतन सभागृहाचे लोकार्पण; विसर्जन घाट दुरुस्ती, रस्ते काँक्रीटीकरण आणि साडेतीन कोटींच्या खारभूमी योजनेचे आश्वासन
MLA Shekhar Nikam Bhile Chiplun News संदर्भात चिपळूण तालुक्यातून एक विकासवार्ता समोर आली आहे. ‘बोलायचे कमी आणि कामातून दाखवायचे अधिक’ या भूमिकेतून भिले मधलीवाडीतील विकासकामांना सातत्याने भक्कम पाठबळ देणारे आमदार शेखर निकम यांचा स्थानिक ग्रामस्थांच्या वतीने कृतज्ञतापूर्वक सत्कार करण्यात आला.
वाडीतील नूतन सभागृहाचे काम पूर्ण झाल्यानंतर आमदार निकम यांनी स्वतः उपस्थित राहून या सभागृहाची पाहणी केली. या प्रसंगी ग्रामस्थांनी त्यांच्या कार्यकर्तृत्वाचा गौरव करत विकासकामांसाठी दिलेल्या सहकार्याबद्दल आभार मानले. या वेळी ग्रामस्थांच्या मागणीचा मान राखत मधलीवाडीतील गणपती विसर्जन घाटाच्या दुरुस्तीचा प्रश्न तातडीने मार्गी लावण्याचा शब्द आमदार निकम यांनी दिला. विसर्जन घाट दुरुस्तीला तात्काळ मंजुरी देण्यासह रस्त्याचे काँक्रीटीकरण आणि अन्य प्रस्तावित कामे येत्या वर्षभरात पूर्ण करून देऊ, अशी ग्वाही त्यांनी दिली.
तसेच भिले कालुस्ते खारभूमी विकास योजनेसाठी साडेतीन कोटी रुपयांचा निधी मंजूर झाला असून, दिवाळीनंतर या कामाला प्रत्यक्ष सुरुवात होणार असल्याचे त्यांनी स्पष्ट केले. भिले गावातील विविध लहान-मोठ्या विकासकामांसाठी आतापर्यंत कोट्यवधी रुपयांचा निधी उपलब्ध करून देण्यात आला असून, गावाच्या गरजेनुसार यापुढेही विकासाचा हा ओघ असाच सुरू राहील, असे त्यांनी सांगितले.
प्रदूषणाचा आंबा-काजू बागायतींवर परिणाम:
लोटे औद्योगिक वसाहतीतील रासायनिक कारखान्यांच्या प्रदूषणामुळे खाडीपट्ट्यातील आंबा आणि काजूच्या बागायतींवर होत असलेल्या प्रतिकूल परिणामांचा मुद्दा या वेळी बैठकीत उपस्थित करण्यात आला. यावर बोलताना या परिणामांचा शास्त्रोक्त अभ्यास करण्यासाठी दापोली येथील कोकण कृषी विद्यापीठाशी (डॉ. बाळासाहेब सावंत कोकण कृषी विद्यापीठ) चर्चा सुरू असल्याची महत्त्वपूर्ण माहिती आमदार निकम यांनी दिली.
कार्यक्रम प्रसंगी ज्येष्ठ ग्रामस्थ लक्ष्मण रेवाळे यांनी प्रास्ताविकात मधलीवाडीतील विकासकामांचा आढावा घेतला. या कार्यक्रमाला माजी पंचायत समिती सदस्य पांडुरंग माळी, उपसरपंच उमेश सकपाळ, केतकीचे उपसरपंच प्रदीप घाडगे, प्रभाकर सैतवडेकर, विजय दिवेकर, प्रशांत ठाकूर, भिले कुणबी समाजोन्नती संघ मुंबईचे अध्यक्ष सुरेश भुवड, भिले देवस्थान अध्यक्ष दत्ताराम नवेले यांच्यासह अनेक ग्रामस्थ मोठ्या संख्येने उपस्थित होते. कार्यक्रमाचे सूत्रसंचालन राकेश आदवडे यांनी केले.
