शृंगारतळी पंप परिसरात वाहनांच्या लांबच लांब रांगा; जानवळे गावातील ग्रामस्थ आणि महामार्गावरील प्रवाशांची सुरक्षितता धोक्यात
गुहागर शहर (रत्नागिरी): गुहागर तालुक्यातील शृंगारतळी येथील सीएनजी पंपावर होणारी वाहनांची प्रचंड गर्दी आता जानवळे गावातील ग्रामस्थ आणि महामार्गावरून जाणाऱ्या वाहनधारकांसाठी भीषण अपघाताला निमंत्रण देणारी ठरत आहे. सीएनजी भरण्यासाठी वाहनांच्या लांबच लांब रांगा रस्त्याच्या एका बाजूला लागत असल्याने जानवळे गावात जाणाऱ्या व येणाऱ्या वाहनधारकांना समोरील वाहनांचा अंदाज येत नाही. राष्ट्रीय महामार्गावरून वेगाने येणाऱ्या वाहनांमुळे या ठिकाणी गंभीर अपघाताचा धोका कमालीचा वाढला आहे.
गणेशोत्सवानंतर वाहनांची संख्या वाढल्याने कोंडीत भर
गणेशोत्सवाची सांगता झाल्यानंतर आता कोकणवासीय मुंबई, पुणे तसेच इतर ठिकाणी परतू लागले आहेत. त्यामुळे शहर आणि परिसरातील प्रमुख मार्गांवर वाहनांची संख्या प्रचंड वाढली आहे. याचा थेट परिणाम शृंगारतळी येथील सीएनजी पंपावर दिसून येत असून, सीएनजी भरण्यासाठी वाहनांच्या रांगा रस्त्यावर पसरत आहेत. रस्त्याच्या एका बाजूला मोठ्या संख्येने वाहने उभी राहत असल्याने समोरील वाहनचालकाला रस्ता स्पष्ट दिसत नाही, ज्यामुळे येथे मोठा अपघात होण्याची दाट शक्यता निर्माण झाली आहे.
अपघाताची पुनरावृत्ती आणि सुरक्षारक्षकाची आवश्यकता
या वाहनांच्या रांगेमुळे काही दिवसांपूर्वी रस्त्याशेजारी उभ्या असलेल्या एका वाहनाचे नुकसान झाले होते. या समस्येचे गांभीर्य लक्षात घेऊन पंप व्यवस्थापनाने वाहतूक नियंत्रणासाठी तातडीने सुरक्षारक्षक नेमण्याची नितांत गरज असल्याचे मत व्यक्त होत आहे.
मनसे उपजिल्हाध्यक्षांची प्रशासनाकडे मागणी
या गंभीर समस्येवर तातडीने आणि कायमस्वरूपी उपाययोजना करण्यात यावी, अशी जोरदार मागणी महाराष्ट्र नवनिर्माण सेनेचे (मनसे) उपजिल्हाध्यक्ष विनोद जानवळकर यांनी प्रशासनाकडे केली आहे. अपघात घडण्यापूर्वीच संबंधित विभागाने आणि सीएनजी पंप प्रशासनाने यावर वेळीच उपाययोजना करावी, अशी आग्रही मागणी स्थानिक नागरिक व प्रवाशांकडून केली जात आहे.
