सर्वसामान्यांशी जोडलेली नाळ अधोरेखित करणारा भावनिक प्रसंग; दिवसभरात शहरवासीयांकडून शुभेच्छांचा वर्षाव
रत्नागिरी : रत्नागिरी नगरपरिषदेचे प्रभाग क्रमांक ५ चे नगरसेवक सौरभ मलुष्टे यांचा वाढदिवस आज शहरात मोठ्या उत्साहात आणि विविध उपक्रमांनी साजरा करण्यात आला. दिवसभरात रत्नागिरी शहर व परिसरातील विविध क्षेत्रांतील मान्यवर, राजकीय पदाधिकारी आणि नागरिकांनी त्यांची प्रत्यक्ष भेट घेऊन त्यांना उदंड आयुष्यासाठी शुभेच्छा दिल्या. मात्र, या सर्व शुभेच्छांच्या गर्दीत घडलेली एक भेट अत्यंत विलक्षण, हृदयस्पर्शी आणि सौरभ मलुष्टे यांच्या तळागाळातील दांडग्या जनसंपर्काची प्रचिती देणारी ठरली.
सफाई कामगारांनी घरी येऊन कापला केक :
सकाळी सौरभ मलुष्टे यांच्या निवासस्थानी प्रभागातील सफाई कर्मचाऱ्यांनी स्वतःहून हजेरी लावली. दिवस-रात्र शहर स्वच्छ ठेवणाऱ्या या कष्टकरी सफाई कामगारांनी मलुष्टे यांच्यासोबत केक कापून त्यांना वाढदिवसाच्या भरभरून शुभेच्छा दिल्या. हातातील झाडू बाजूला ठेवून आपल्या लाडक्या लोकप्रतिनिधीच्या आनंदात सहभागी होणाऱ्या या कामगारांच्या चेहऱ्यावरील आनंद खूप काही सांगून जाणारा होता.
सर्व घटकांना सन्मान देणाऱ्या वृत्तीची खरी पोचपावती :
समाजातील प्रत्येक घटकाला समान आदर आणि सन्मानाची वागणूक देणाऱ्या लोकप्रतिनिधी म्हणून सौरभ मलुष्टे यांची ओळख आहे. सफाई कामगारांनी स्वतःहून पुढे येत दिलेली ही साद म्हणजे त्यांच्या याच निःस्वार्थ सेवेची आणि संवेदनशीलतेची मिळालेली खरीखुरी पोचपावती मानली जात आहे. आपल्या प्रभागात राबणाऱ्या शेवटच्या घटकाशीही त्यांचे असलेले ऋणानुबंध किती घट्ट आहेत, हे या प्रसंगाने पुन्हा एकदा अधोरेखित केले.
आपुलकीच्या नात्याची शहरात चर्चा :
नगरसेवक आणि नागरिकांमधील नाते केवळ कामापुरते मर्यादित न राहता ते कौटुंबिक आणि आपुलकीचे कसे असू शकते, याचा उत्तम आदर्श या भेटीतून दिसून आला. एका लोकप्रतिनिधीच्या वाढदिवसाची सुरुवात सफाई कर्मचाऱ्यांच्या निखळ प्रेमाने आणि आशीर्वादाने व्हावी, या विलक्षण क्षणाची सध्या संपूर्ण रत्नागिरी शहरात कौतुकासह जोरदार चर्चा सुरू आहे.
