किरकोळ वादातून मित्रालाच दिली बेदम चोप; युवक जिल्हा रुग्णालयात दाखल
Ratnagiri Mandvi Beach Assault प्रकरणी रत्नागिरी शहरातील प्रसिद्ध मांडवी बीच परिसर गुरुवारी सकाळी हाणामारीच्या घटनेने हादरला. किरकोळ कारणातून झालेल्या वादावादीनंतर दोन मित्रांनी मिळून आपल्याच मित्राला काठीने आणि हाताच्या थापटांनी बेदम मारहाण केली. ही घटना १ ऑक्टोबर रोजी सकाळी १०:३० वाजण्याच्या सुमारास घडली.
या प्रकरणी रोहन ठिक आणि सोहम पड्यार अशी गुन्हा दाखल करण्यात आलेल्या दोन्ही संशयित आरोपी मित्रांची नावे आहेत. या मारहाणीप्रकरणी स्वरूप दोरखंडे (वय/रा. फणसोप, रत्नागिरी) याने रत्नागिरी शहर पोलीस ठाण्यात अधिकृत तक्रार दिली आहे. त्याच्या तक्रारीवरून पोलिसांनी दोन्ही संशयितांविरुद्ध गुन्हा नोंदवला आहे.
पोलिसांनी दिलेल्या माहितीनुसार, गुरुवारी सकाळी स्वरूप दोरखंडे हा मांडवी बीचवर आपले मित्र रोहन ठिक आणि सोहम पड्यार यांना भेटण्यासाठी आला होता. तिघे एकत्र असताना त्यांच्यात अचानक काही कारणावरून शाब्दिक चकमक उडाली. या वादाचे रूपांतर नंतर हाणामारीत झाले. यानंतर रोहन आणि सोहम यांनी एकत्र येत स्वरूपला काठीने आणि हाताच्या थापटांनी जबर मारहाण केली.
या मारहाणीत स्वरूप गंभीर जखमी झाला. घटनेनंतर उपस्थितांच्या मदतीने त्याला तातडीने उपचारासाठी रत्नागिरी जिल्हा शासकीय रुग्णालयात दाखल करण्यात आले. तेथे त्याच्यावर वैद्यकीय उपचार सुरू आहेत. घटनेची माहिती मिळताच पोलिसांनी रुग्णालयात जाऊन जखमीचा जबाब घेतला असून, या प्रकरणी पुढील अधिक तपास रत्नागिरी शहर पोलीस करत आहेत.
