जिल्हा परिषद अध्यक्षा अस्मिता केंद्रे आणि मुख्य कार्यकारी अधिकारी वैदेही रानडे यांची प्रमुख उपस्थिती; तालुका आणि ग्रामपंचायत स्तरावर तयार होणार कृती आराखडा
रत्नागिरी : Ratnagiri Majha Gaav Workshop उपक्रमांतर्गत ‘माझं गाव, आरोग्यसंपन्न गाव’ या राज्य सरकारच्या महत्त्वाकांक्षी अभियानाच्या प्रभावी अंमलबजावणीसाठी रत्नागिरी जिल्हा परिषदेच्या लोकनेते शामराव पेजे सभागृहात भव्य जिल्हास्तरीय कार्यशाळेचे आयोजन करण्यात आले होते. या कार्यशाळेत आरोग्य विभागासह सर्वच प्रशासकीय विभागांनी परस्परांच्या समन्वयाने काम करून रत्नागिरी जिल्हा आरोग्यसंपन्न करण्याचा दृढ निर्धार व्यक्त केला.
कार्यक्रमाचे उद्घाटन जिल्हा परिषद अध्यक्षा अस्मिता केंद्रे, उपाध्यक्ष विलास साळके, मुख्य कार्यकारी अधिकारी (CEO) वैदेही रानडे, उप मुख्य कार्यकारी अधिकारी सागर पाटील, जिल्हा आरोग्य अधिकारी डॉ. अनिरुद्ध आठल्ये आणि जिल्हा शल्य चिकित्सक डॉ. भास्कर जगताप यांच्या प्रमुख उपस्थितीत दीपप्रज्वलनाने पार पडले. या प्रसंगी राज्यस्तरीय प्रशिक्षक राजू गुत्ते, प्रीती साबळे आणि सूरज कांबळे यांनी अभियानाचे विविध निकष आणि नियोजन पद्धतींवर सविस्तर मार्गदर्शन केले.
आपल्या प्रास्ताविकात जिल्हा आरोग्य अधिकारी डॉ. अनिरुद्ध आठल्ये यांनी अभियानाशी संबंधित विविध निर्देशांकांची माहिती दिली. गावातील सर्व घटकांचा सहभाग नोंदवून दस्तऐवजीकरण (Record Keeping) आणि आरोग्य योजनांची अंमलबजावणी तळागाळापर्यंत पोहोचवणे आवश्यक असल्याचे त्यांनी स्पष्ट केले. तर मुख्य कार्यकारी अधिकारी वैदेही रानडे यांनी कुपोषित बालकांचे आरोग्य, किशोरवयीन मुला-मुलींचे पोषण, असंसर्गजन्य आजारांचे नियंत्रण आणि एचपीव्ही (HPV) लसीकरण यांवर विशेष भर देण्याचे आवाहन केले.
अध्यक्षीय भाषणात जिल्हा परिषद अध्यक्षा अस्मिता केंद्रे यांनी, "आरोग्य ही केवळ एका विभागाची जबाबदारी नसून ती समाजातील प्रत्येक घटकाची सामूहिक जबाबदारी आहे. हे अभियान केवळ ठराविक कालावधीपुरते मर्यादित न ठेवता प्रत्येकाने सकारात्मक आणि आरोग्यदायी जीवनशैलीचा अंगीकार केला पाहिजे," असे सांगत लोकसहभागाचे महत्त्व अधोरेखित केले. उपाध्यक्ष विलास साळके यांनी पंचायत समिती आणि ग्रामपंचायत स्तरावरही अशाच प्रकारच्या कार्यशाळा घेऊन कृती आराखडा तयार करण्याची गरज व्यक्त केली.
या कार्यशाळेत जिल्ह्यातील लोकप्रतिनिधी, सरपंच, ग्रामसेवक, बीडीओ, वैद्यकीय अधिकारी, आरोग्य सेवक-सेविका आणि आशा गटप्रवर्तक मोठ्या संख्येने सहभागी झाले होते. दिवसभर चाललेल्या या प्रशिक्षणातून मिळालेल्या मार्गदर्शनाच्या आधारे आता पुढील टप्प्यात प्रत्येक तालुक्यात आणि गावात विशेष कृती आराखडे (Action Plan) तयार करून अभियानाची प्रत्यक्ष अंमलबजावणी सुरू केली जाणार आहे.
