मच्छिमारांना कृषी दराने वीज पुरवठा करण्याच्या सूचना
Ratnagiri Jal Jeevan Mission Review: रत्नागिरी-संगमेश्वर मतदारसंघातील जलजीवन मिशनची कामे ठरवून दिलेल्या मुदतीत पूर्ण न करणाऱ्या संबंधित ठेकेदारांना भविष्यात काळ्या यादीमध्ये टाकण्यात येईल, असा सक्त इशारा पालकमंत्री डॉ. उदय सामंत यांनी दिला आहे.
रत्नागिरीतील शासकीय विश्रामगृहात रत्नागिरी-संगमेश्वर मतदारसंघातील जलजीवन मिशन अंतर्गत नळपाणी योजनेच्या संदर्भात एका आढावा बैठकीचे आयोजन करण्यात आले होते, त्यावेळी ते बोलत होते. या बैठकीला ग्रामीण पाणी पुरवठा विभागाचे कार्यकारी अभियंता अमोल दाभोळकर, महावितरणचे अधीक्षक अभियंता सुधाकर जाधव, उपविभागीय अधिकारी जीवन देसाई यांच्यासह मतदारसंघातील ठेकेदार उपस्थित होते.
जलजीवन मिशन आणि पाणीपुरवठा विभागाला महत्त्वाच्या सूचना
भविष्यातील संभाव्य दुष्काळाची परिस्थिती डोळ्यांसमोर ठेवून जलजीवन मिशनची सर्व कामे लवकरात लवकर पूर्ण करावीत, असे निर्देश पालकमंत्र्यांनी दिले. तसेच महावितरण आणि पाणी पुरवठा विभागाने एकमेकांशी अचूक समन्वय ठेवून ही कामे तातडीने पूर्ण करण्यासाठी प्रयत्न करावेत. जर ही कामे पूर्ण करताना स्थानिक नागरिक किंवा अन्य कोणी अडथळा निर्माण करत असेल, तर त्यांच्या विरोधात त्वरित पोलीस विभागाकडे तक्रार दाखल करावी, अशा सूचनाही डॉ. सामंत यांनी संबंधितांना दिल्या.
अभियांत्रिकी महाविद्यालयाच्या विद्यार्थ्यांच्या समस्या जाणून घेतल्या
या बैठकीदरम्यान पालकमंत्री डॉ. उदय सामंत यांनी श्यामराव पेजे शासकीय अभियांत्रिकी महाविद्यालयातील विद्यार्थ्यांच्या विविध अडीअडचणी व समस्या प्रत्यक्ष जाणून घेतल्या.
महाविद्यालयात स्टाफची कमतरता असणे.
प्रशिक्षणाचा अभाव असणे.
लॅबमध्ये पुरेशा उपकरणांची उपलब्धता नसणे.
अशा विविध महत्त्वाच्या समस्या विद्यार्थ्यांनी पालकमंत्र्यांसमोर मांडल्या. यावर सकारात्मक प्रतिसाद देत या सर्व समस्या लवकरात लवकर सोडविण्यात येतील, असे ठोस आश्वासन पालकमंत्र्यांनी विद्यार्थ्यांना दिले. तसेच महाविद्यालयात ‘टेक्निकल फेस्टिव्हल’ आणि ‘ऑटो एक्सपो’सारखी प्रदर्शने भरवण्यासाठी विद्यार्थ्यांना प्रशासनाकडून सर्वतोपरी सहकार्य करण्यात येईल, असेही त्यांनी स्पष्ट केले. या प्रसंगी महाविद्यालयाचे प्राचार्य सुधीर अकोजवार, विद्यार्थी संघटनेचे प्रतिनिधी व विद्यार्थी मोठ्या संख्येने उपस्थित होते.
मच्छिमारांना कृषी दराने वीज पुरवठा करण्याचे निर्देश
९ मे २०२५ रोजीच्या शासन निर्णयानुसार मच्छिमार, मत्स्यसंवर्धक व मत्स्यकास्तकारांना कृषी क्षेत्राप्रमाणेच पायाभूत सुविधा व सवलती देण्याची तरतूद आहे. या योजनेअंतर्गत प्रक्रिया उद्योग वगळता इतरांना कृषीदराने वीज पुरवठा करण्यात येतो. या संदर्भात मत्स्यव्यवसाय विभागाकडून महावितरणकडे ५६ प्रस्ताव पाठवण्यात आले होते, त्यापैकी २२ प्रस्ताव मंजूर करण्यात आले आहेत. मंजूर झालेल्या या सर्व प्रस्तावाधारकांना तात्काळ कृषी दराने वीज पुरवठा सुरू करावा, अशा स्पष्ट सूचनाही पालकमंत्र्यांनी या बैठकीत दिल्यात.
या उच्चस्तरीय आढावा बैठकीस सहायक आयुक्त मत्स्यव्यवसाय जीवन सावंत, नगरसेवक बंड्या साळवी, माजी नगरसेवक सुदेश मयेकर, ॲड. समृद्धी मयेकर आदी अधिकारी व मान्यवर उपस्थित होते.
