इम्रान खानला २८ ऑक्टोबरपर्यंत भारत सोडण्याच्या आदेशानंतर राजकीय वाद पेटला; सीजेपी संस्थापकाचा भाजपवर पलटवार
मुंबई :
Abhijit Dipke Imran Khan Notice मुळे राज्यातील राजकीय आणि सामाजिक वातावरणात मोठे वादळ निर्माण झाले आहे. बॉलिवूड अभिनेता आमिर खानचा भाचा आणि प्रसिद्ध अभिनेता इम्रान खान याला येत्या २८ ऑक्टोबरपर्यंत भारत सोडण्याचे निर्देश मुंबई पोलिसांनी बजावल्याच्या पार्श्वभूमीवर, कॉकरोच जनता पार्टीचे (CJP) संस्थापक अभिजीत दिपके यांनी भाजपवर अत्यंत तीव्र शब्दांत हल्लाबोल केला आहे. मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी मुंबईतील ऑगस्ट क्रांती मैदानावर झालेल्या आंदोलनात इम्रान खान सहभागी झाला होता.
आंदोलनात सहभाग अन् इमिग्रेशन कायद्यांतर्गत कारवाई
मुंबई पोलिसांनी आंदोलनादरम्यान इम्रान खानला ताब्यात घेतले होते. भारतीय नागरिक नसतानाही भारतातील राजकीय आंदोलनात भाग घेतल्याचा ठपका ठेवत त्याच्यावर ‘इमिग्रेशन ॲक्ट’च्या संबंधित कलमांनुसार गुन्हा दाखल करण्यात आला. यानंतर मुंबई पोलिसांनी त्याला २८ ऑक्टोबरपर्यंत देश सोडण्याचे निर्देश दिले आहेत. या कारवाईविरोधात इम्रान खान मुंबई उच्च न्यायालयात दाद मागणार असून त्याच्या वतीने उच्च न्यायालयात याचिका दाखल केली जाणार आहे.
मेरी मिल्बेनच्या मुद्द्यावरून अभिजीत दिपकेंचा सडेतोड सवाल
इम्रान खानला बजावण्यात आलेल्या नोटिशीनंतर सीजेपी संस्थापक अभिजीत दिपके यांनी ट्विट करत सरकारला आणि भाजपला धारेवर धरले. अमेरिकन गायिका मेरी मिल्बेनने सीजेपीला अमेरिकेकडून फंडिंग मिळत असल्याचा गंभीर आरोप केला होता. यावर पलटवार करताना दिपके यांनी म्हटले की, "मेरी मिल्बेन ही पूर्णपणे अमेरिकन नागरिक असूनही भाजपच्या बाजूने बोलू शकते आणि भारतातील राजकीय विषयात हस्तक्षेप करू शकते; मात्र इम्रान खान हा ओव्हरसीज सिटिझन ऑफ इंडिया (OCI) कार्डधारक असूनही भाजप सरकारविरोधात काहीही बोलू शकत नाही का?"
परदेशी नागरिकांच्या हस्तक्षेपावरून वाकयुद्ध
अमेरिकन गायिका मेरी मिल्बेनने दावा केला होता की, भारतात आंदोलने घडवून आणण्यासाठी सीजेपीला अमेरिकेतून निधी मिळत आहे. तसेच तिने भारतीय तरुणांना शांततेचे आवाहन करत, दिपके यांना पंतप्रधानांसोबत बसून देशाच्या प्रगतीवर चर्चा करण्याचा सल्ला दिला होता. याला उत्तर देताना अभिजीत दिपके म्हणाले की, "परदेशी नागरिकांनी भारताच्या अंतर्गत बाबींमध्ये अजिबात हस्तक्षेप करू नये. भारताच्या अंतर्गत घडामोडींमध्ये बोलण्याचा अधिकार परदेशी लोकांना कोणी दिला? आम्ही आमचे प्रश्न स्वतः हाताळण्यास पूर्णपणे सक्षम आहोत."
