केंद्रीय मंत्रिमंडळाचा २,००९.६१ कोटी रुपयांचा महत्त्वपूर्ण निर्णय; प्रत्येक कर्मचाऱ्याला मिळणार तब्बल १७,९५१ रुपये
नवी दिल्ली :
Railway Staff PLB Bonus संदर्भात केंद्र सरकारने दसऱ्याच्या सणापूर्वी देशातील रेल्वे कर्मचाऱ्यांसाठी अत्यंत आनंदवार्ता आणि मोठा निर्णय जाहीर केला आहे. पंतप्रधान नरेंद्र मोदी यांच्या अध्यक्षतेखाली पार पडलेल्या केंद्रीय मंत्रिमंडळाच्या बैठकीत ११ लाख ४० हजार ७७० रेल्वे कर्मचाऱ्यांना ७८ दिवसांचा ‘उत्पादकता निगडित बोनस’ (Productivity Linked Bonus – PLB) देण्यास अधिकृत मंजुरी देण्यात आली आहे. या निर्णयामुळे रेल्वे कर्मचाऱ्यांमध्ये उत्साहाचे वातावरण निर्माण झाले आहे.
२,००९.६१ कोटी रुपयांच्या निधीला मंजुरी
केंद्रीय मंत्रिमंडळाने सुमारे ११.४० लाख अराजपत्रित (Non-Gazetted) रेल्वे कर्मचाऱ्यांसाठी तब्बल २,००९.६१ कोटी रुपयांचा निधी मंजूर केला आहे. दरवर्षी दुर्गापूजा आणि दसऱ्याच्या सुट्ट्यांपूर्वी पात्र कर्मचाऱ्यांना हा बोनस प्रदान केला जातो. रेल्वे कर्मचाऱ्यांनी वर्षभरात केलेल्या उत्कृष्ट कामगिरीचा सन्मान करण्यासाठी आणि त्यांना भविष्यात अधिक कार्यक्षमतेने काम करण्यास प्रोत्साहित करण्यासाठी हा बोनस प्रेरणा म्हणून काम करतो.
प्रत्येक पात्र कर्मचाऱ्याला मिळणार १७,९५१ रुपये
या निर्णयानुसार प्रत्येक पात्र रेल्वे कर्मचाऱ्याला ७८ दिवसांचे वेतन म्हणून जास्तीत जास्त १७,९५१ रुपये मिळणार आहेत. ही आर्थिक मदत ट्रॅक मेंटेनर, लोको पायलट, ट्रेन मॅनेजर (गार्ड), स्टेशन मास्टर, सुपरवायझर, तंत्रज्ञ, तंत्रज्ञ सहाय्यक, पॉइंट्समन, मंत्रालयीन कर्मचारी तसेच इतर गट ‘क’ (Group C) च्या विविध श्रेणीतील कर्मचाऱ्यांना मिळणार आहे.
२०२५-२६ या वर्षात रेल्वेची विक्रमी कामगिरी
वर्ष २०२५-२६ या कालावधीत भारतीय रेल्वेची कामगिरी अत्यंत प्रभावी आणि विक्रमी राहिली आहे. या वर्षात रेल्वेने तब्बल १६७० दशलक्ष टन मालाची विक्रमी वाहतूक केली, तसेच सुमारे ७.४१ अब्ज प्रवाशांना त्यांच्या गंतव्यस्थानी पोहोचवले. कर्मचाऱ्यांच्या या अहोरात्र मेहनतीमुळेच रेल्वेने ही उत्तम कामगिरी नोंदवली असून, त्याचीच पोहोच पावती म्हणून सरकारने हा दिवाळी-दसऱ्याचा बोनस जाहीर केला आहे.
