दरड कोसळल्याने गेल्या तीन महिन्यांपासून बंद असलेला आंबा घाट घटस्थापनेपासून दिवसाच्या वेळेत जड वाहनांसाठी खुला; रात्री ७ ते सकाळी ७ पर्यंत मात्र बंदी कायम
*देवरुख (रत्नागिरी): *दरड कोसळण्याच्या धोक्यामुळे गेल्या तीन महिन्यांपासून अवजड वाहनांसाठी बंद असलेला महत्त्वाचा असा आंबा घाट घटस्थापनेपासून पुन्हा खुला करण्यात आला आहे. राजापूरचे आमदार किरण सामंत यांनी या प्रकरणी पुढाकार घेतल्याने अवजड वाहनांना दिवसा वाहतूक करण्याची परवानगी मिळाली असून, यामुळे ट्रकचालक आणि वाहतूकदारांमधून मोठा दिलासा व्यक्त होत आहे.
पार्श्वभूमी व मागील अडचणी
गेल्या जुलै महिन्यात आंबा घातातील विसावा पॉईंटच्या आधी रस्त्याच्या खालच्या बाजूला दरड कोसळण्यास सुरुवात झाली होती. हा मार्ग धोकादायक बनल्याने काही काळ वाहतूक पूर्णपणे बंद ठेवण्यात आली होती. त्यानंतर प्रवासी व लहान वाहनांची गैरसोय लक्षात घेऊन पोलिसांनी बंदोबस्तात एसटी व लहान वाहनांची वाहतूक सुरू केली होती. मात्र, दरडीचा भाग पुन्हा कोसळू लागल्याने अवजड वाहनांवरील बंदी कायम ठेवण्यात आली होती.
आमदार किरण सामंत यांचे प्रयत्न आणि बैठका
गणेशोत्सवाच्या पार्श्वभूमीवर आमदार किरण सामंत यांनी रत्नागिरी व कोल्हापूर जिल्हाधिकाऱ्यांसह राष्ट्रीय महामार्गाच्या अभियंत्यांसोबत घाटाची पाहणी केली होती. त्यानंतरही अवजड वाहनांना परवानगी मिळाली नव्हती. १० ऑक्टोबर रोजी साखरपा येथे झालेल्या कार्यक्रमादरम्यान ट्रक वाहतूकदार संघटना पदाधिकाऱ्यांनी आमदार सामंत यांची भेट घेऊन बंदीमुळे होणाऱ्या अडचणी मांडल्या होत्या. पाऊस थांबल्याने दरड कोसळण्याचा धोका कमी झाल्याचे सांगत अवजड वाहतूक सुरू करण्याची मागणी करण्यात आली.
यानंतर आमदार सामंत यांनी घटस्थापनेपासून अवजड वाहतूक सुरू करण्याची ठाम भूमिका घेतली, अखेर शासनाने खबरदारीच्या उपाययोजनांसह दिवसा वाहतुकीला परवानगी दिली आहे.
सध्याची वाहतूक स्थिती व व्यापारी वर्गात समाधान
सध्या आंबा घाटातून दिवसा सर्व प्रकारची वाहतूक सुरू असून, सायंकाळी ७ ते सकाळी ७ या वेळेत अवजड वाहनांना बंदी कायम ठेवण्यात आली आहे. अवजड वाहतूक सुरू झाल्याने पश्चिम महाराष्ट्रातून कोकणात येणाऱ्या वस्तूंचा पुरवठा सुरळीत होण्यास मदत झाली असून, यामुळे वाहतूकदारांसह व्यापाऱ्यांमध्ये आनand व समाधानाचे वातावरण पसरले आहे.
