‘कोकण ज्ञान तरंग’ ब्रीदवाक्यासह २५० किमीच्या ‘मेन्यू २७’ नौकावहन मोहिमेची पूर्वतयारी पूर्ण
रत्नागिरी :
NCC Pre-Menu Camp Ratnagiri अंतर्गत नॅशनल कॅडेट कॉर्प्स (NCC) द्वारे आयोजित १० दिवसांच्या ‘प्री-मेन्यू’ प्रशिक्षण कॅम्पचा रत्नागिरीत यशस्वी समारोप झाला आहे. आगामी ‘मेन्यू २७’ या २५० किलोमीटरच्या खडतर सागरी नौकावहन मोहिमेची पूर्वतयारी म्हणून या विशेष शिबिराचे आयोजन करण्यात आले होते. या शिबिरामध्ये संपूर्ण महाराष्ट्रातून आलेल्या कॅडेट्सनी आपले दर्यावर्दी कौशल्य सिद्ध केले आहे. प्रशिक्षण पूर्ण केलेल्या १२० कॅडेट्सपैकी सर्वोत्तम ६० कॅडेट्सची मुख्य ‘मेन्यू २७’ सागरी मोहिमेसाठी निवड करण्यात आली आहे.
१२० कॅडेट्सचा सहभाग आणि त्रि-सेवा प्रशिक्षण
या ‘प्री-मेन्यू’ शिबिरात मुंबई, पुणे, नागपूर आणि छत्रपती संभाजीनगर एनसीसी ग्रुपच्या १२० कॅडेट्सनी सहभाग घेतला होता. यात १०३ नवाल (Naval), १५ आर्मी आणि ०२ एअरफोर्स कॅडेट्सचा समावेश होता. या त्रि-सेवा कॅडेट्सनी गेल्या १० दिवसांत २७-फूट ‘डीके व्हेलर’ बोटी चालवण्याचे, नौकावहनाचे व रोईंगचे खडतर प्रशिक्षण यशस्वीरीत्या पूर्ण केले. कॅडेट्समधील साहसी वृत्ती व आत्मविश्वास वाढवण्यासाठी रॅपलिंग आणि समुद्रातील पॅरासेलिंगचे विशेष प्रात्यक्षिकही घेण्यात आले.
‘कोकण ज्ञान तरंग’ मोहीम आणि सामाजिक जनजागृती
यंदाच्या सागरी मोहिमेची संकल्पना ‘कोकण ज्ञान तरंग’ अशी असून ‘ज्ञान आणि प्रगतीची धरून कास-आदर्श कोकणाचा करूया विकास’ हे याचे ब्रीदवाक्य आहे. या मोहिमेची सुरुवात १५ ऑक्टोबरपासून होणार आहे. निवडक कॅडेट्स २७-फूट डीके व्हेलर बोटींमधून रत्नागिरी ते पालशेत आणि परतीचा असा एकूण २५० किमीचा प्रवास समुद्राच्या लाटांवर मात करत पूर्ण करतील.
कमांडिंग ऑफिसर रामांनजूल दीक्षित यांनी पत्रकार परिषदेत दिलेल्या माहितीनुसार, ही मोहीम केवळ साहसी प्रवास नसून सामाजिक बदलाचे माध्यम ठरणार आहे. प्रवासादरम्यान कॅडेट्स किनारपट्टीच्या भागात ‘पथनाट्य’ सादर करणार आहेत. या माध्यमातून मोफत व सक्तीचे शिक्षण, महिला शिक्षण आणि महिला सक्षमीकरणाचा महत्त्वाचा संदेश घराघरांत पोहोचवून जनजागृती केली जाईल.
पर्यावरण संवर्धन आणि संस्थांचे आभार
या मोहिमेची पूर्वतयारी म्हणून सर्व १२० कॅडेट्ससाठी रत्नागिरीतील मत्स्यालय आणि खाडीतील खारफुटी क्षेत्राची शैक्षणिक भेट आयोजित करण्यात आली होती. कॅडेट्सना सागरी जैवविविधता व पर्यावरण संवर्धनाचे धडे दिल्याबद्दल एनसीसी महाराष्ट्राच्या वतीने शिरगाव फिशरीज पॉलिटेक्निक इंजिनिअरिंग कॉलेज व आसमंत फाउंडेशनचे विशेष आभार मानण्यात आले आहेत.
